Juventus mori një fitore të rëndësishme në Serie A, teksa mposhti ditën e djeshme me rezultatin 0-2, Lazion. Mirëpo, trajneri Massimiliano Allegri nuk mund të festojë plotësisht duke qenë se ka humbur për shkak dëmtimi Danilon.
Mbrojtësi brazilian pati një përplasje të fortë me Elseid Hysajn dhe në minutën e 15 u detyrua të linte fushën e lojës ndërsa dhimbjet për 30-vjeçarin ishin të mëdha me lojtarin që nuk i mbajti dot lotët dhe u largua vetëm me ndihmën e barelës.
Në klubin bardhezi shqetësohen për faktin se Danilo mund të ketë dëmtuar gjurin dhe këtu do të kishte telashe për të dyja palët.
Megjithatë, peshën e dëmtimit do ta tregojnë vetëm analizat në vijim, teksa Danilo në këtë sezon ka qenë një ndër të besuarit e trajnerit Allegri dhe mungesa e tij për një kohë të gjatë do të ishte një humbje e madhe.
