Armando Broja mund të ketë një opsion mjaft interesant për të ardhmen e tij në Premier Ligë.
E përditshmja britanike “Mirror”, ka bërë të ditur se sulmuesi i Kombëtares shqiptare ka zgjuar interesin e klubit të Uest Hem, i cili e monitoronte edhe më parë.
Trajneri Devid Mojes kishte kërkuar futbollistin në dy dritaret e kaluara të merkatos, pa shumë sukses.
Me largimin e tij nga drejtimi i këtij klubi, pakkush mendonte se Uest Hem do të vazhdonte të ndiqte Brojën, sidomos pas 4 muajve të fundit larg çdo pritshmërie te Fullhemi. Por e përditshmja britanike bën të ditur se edhe pasardhësi i Mojes, Julen Lopetegui, është i interesuar për Brojën.
Ish-trajneri i Real Madrid dhe Spanjës, tashmë kërkon të rinojë skuadrën dhe të nisë një projekt të ri, me emrin e Brojës në listën e atyre që klubi sheh si përforcime të mundshme në një merkato vere që pritet t’i shohë si protagonistë me shumë lëvizje të programuara.
