Intervistë me Alessandro Costacurta, i njohur më mirë me pseudonimin “Billy”. Ish-mbrojtësi, tashmë komentator televiziv, tenton të “shohë letrat” për kampionatin e ri italian, në “Tuttosport”: “Interi fiton, sepse është skuadra më e fortë.
Sigurisht që nuk mendoj se mund të përsërisë rrugën e sezonit të kaluar, por është favorit absolut në startin e kampionatit të ri. Tani sikur është bërë rregull që kushdo që ka titullin në gjoks do ta pësojë sezonin pasardhës. Ndër të tjerë, Milani dhe Napoli nuk e nisën si favoritë, pas fitimit të kampionatit…”
Më pas Costacurta fokusohet te dy trajnerët e rinj të Juventusit dhe Milanit, Thiago Motta dhe Paulo Fonseca: “Asnjëri prej tyre nuk mund ta përballojë startin e keq të kampionatit. Fonseca për shkak të dyshimeve që rrinë pezull mbi përzgjedhjen e tij, Motta sepse ka shumë, shumë pritshmëri të mëdha. Besoj se për këtë të fundit, megjithatë, ka punë për të bërë, i nevojitet më shumë kohë. Le t’i japim atij një vit, pastaj produktin t’ia shohim në fund të sezonit të ardhshëm”.
Costacurta fokusohet edhe te Napoli i Contes: “Antonio është shumë i rrezikshëm… Jashtëzakonisht i rrezikshëm. Unë kam shumë respekt për të, besoj se Napoli mund të jetë ‘tokë pjellore’ për një trajner si Conte. Në një situatë si kjo, ai mundet të ketë ndikim të madh”.
Në analizën e tij ka vend edhe për skuadra të tjera kryesore, si Atalanta: “Në sezonet e fundit, Gasperini e ka ngritur shumë cilësinë e skuadrës. Si kurrë më parë, këtë sezon Atalanta mund të përpiqet të fitojë titullin e Serie A. Pasi dominoi Bayer Leverkusen në atë mënyrë, në finalen e ‘Europa League’, unë them se mund ta fitojë titullin këtë edicion ose kurrë”.
Një koment më pas për De Rossi dhe Romën e tij: “Po, këtu vjen pjesa e vështirë. Sezonin e kaluar të gjithë u dashuruam me Daniele, tani ai duhet të dëshmojë se është në lartësinë e detyrës. Roma po ndërton një ekip të mirë për të. Unë e këshilloj që të fokusohet vetëm në një garë”.
