Ndeshjet mes Arberisë dhe Ulpianës kanë qenë të rralla për shkak të pjesëmarrjes së tyre në liga të ndryshme në vitet e fundit. Megjithatë, sot dy skuadrat do të përballen në kuadër të Ligës së Dytë të Kosovës në futboll.
Të dyja ekipet konsiderohen si favorite për këtë divizion, duke marrë parasysh cilësitë që kanë në organikat e tyre, krahasuar me rivalët e tjerë të ligës.
Arbëria do të jetë nikoqire e ndeshjes, e cila do të zhvillohet në stadiumin “Sami Kelmendi”, duke filluar nga ora 16:00. Në xhiron e parë të këtij sezoni, Ulpiana demoloi Rilindjen me rezultat 4:0, ndërsa Arbëria fitoi në një udhëtim të vështirë ndaj Dardanisë me rezultat 0:1.
Dueli i fundit mes këtyre dy ekipeve u zhvillua më 19 Mars 2023, ku Ulpiana triumfoi me rezultat 2:1 me golat e shënuar nga “Lavdim Grainca” dhe Urim Statovci.
Në atë sezon, Ulpiana arriti deri në barazh për t’u inkuadruar në Superligë, por nuk ia doli, ndërsa Arberia përfundoi e fundit në Grupin B të Ligës së Parë, duke rënë në Ligën e Dytë, ku tashmë luan për sezonin e dytë radhazi.
