Flick shuan polemikat

Futboll

Flick shuan polemikat

Më: 30 korrik 2025 Në ora: 11:16
Hansi Flick

Në prag të ndeshjes miqësore ndaj Seulit, trajneri i Barcelonës, Hansi Flick, doli në konferencë për shtyp për të folur mbi temat më të përfolura që lidhen me ekipin blaugrana. Ai u ndal veçanërisht te zërat për një largim të mundshëm të Ronald Araujo, si dhe te situata e ndërlikuar e Marc-André ter Stegen dhe shiriti i kapitenit.

I pyetur nga gazetarët për konfirmimin e qëndrimit të mbrojtësit uruguajan te Barcelona, Flick tha: “Ka gjithmonë shumë zëra për Araújo, por nuk kam marrë asnjë lajm apo sinjal se ai dëshiron të largohet. Kam një skuadër të madhe, me shumë cilësi. E kemi të mbuluar çdo pozicion dhe në disa raste kemi edhe nga tre lojtarë.

Sigurisht që nuk është e lehtë për t’u menaxhuar, por jam i kënaqur”.

Më tej gjermani shtoi: “Më habit fakti që dalin këto zëra për Ronald. Jam shumë i kënaqur me skuadrën që kam në dispozicion”.

Më pas, rasti i Marc-André ter Stegen. A do të mbetet kapiten? Sidomos pas zërave të shumtë për thyerje të plotë të raportit me klubin, pas afrimit të Joan Garcia në portë: “Do të jetë skuadra ajo që do t’i vendosë kapitenët, siç ka bërë gjithmonë. Do të vendosim dy javë para nisjes së sezonit”.

Në fund, një koment për ardhjen e Marcus Rashford dhe përforcimin e kërkuar në sulm: “Marcus është një lojtar i shkëlqyer, e ndjek prej shumë vitesh, që kur nisi karrierën te Manchester United. Ka shumë cilësi dhe shpresojmë t’i tregojë edhe këtu me ne”.

comment Për komente lëvizni më poshtë
Sot mund të lexoni Shfletoni kopertinat