E ardhmja e Arne Slotit ka marrë një kthesë të papritur, pasi holandezi është lidhur me një post të madh vetëm pak ditë pas shkarkimit të tij nga Liverpooli.
Sloti, i cili e udhëhoqi Liverpoolin drejt titullit të Premierligës në vitin 2025, u shkarkua më 30 maj pasi nuk arriti të bindte gjatë sezonit të tij të dytë në “Anfield”.
“The Reds” e përfunduan kampionatin në vendin e pestë dhe e mbyllën sezonin pa asnjë trofe.
Holandezi është zëvendësuar tashmë nga ish-trajneri i Bournemouthit, Andoni Iraola, me klubin nga Merseyside që e konfirmoi emërimin e spanjollit të enjten (4 qershor).
Ndërkohë, Sloti është lidhur me një rikthim të menjëhershëm në pankinë, pasi raportet sugjerojnë se ai është ndër favoritët për të zëvendësuar Marco Silvën te Fulhami.
Ai gjithashtu konsiderohet si një kandidat i mundshëm për t’u bërë trajneri i ardhshëm i Holandës, nëse Ronald Koemani largohet nga posti pas Kupës së Botës.
Koemani, i cili drejton kombëtaren që nga viti 2023, do ta shohë kontratën e tij aktuale të skadojë pas përfundimit të turneut.
Sipas gazetarit holandez Marcel van der Kraan, vendimi i Liverpoolit për ta shkarkuar erdhi si surprizë për Slotin, i cili “besonte fort” se do të vazhdonte në krye të skuadrës edhe sezonin e ardhshëm.
Van der Kraan pretendon se ish-trajneri i Feyenoordit do të ishte shumë i interesuar për të marrë drejtimin e kombëtares holandeze.
“Nëse Ronald Koemani largohet pas Kupës së Botës, atëherë hapet një vend te kombëtarja e Holandës,” tha Van der Kraan.
“Mendoj se Arne Sloti do ta dëshironte shumë atë punë; ndoshta ai është kandidati ideal. Ai mund të aplikojë stilin e tij holandez të futbollit – lojën me pasime, futbollin sulmues, si të doni ta quani. Besoj se holandezët do të ishin të lumtur ta kishin atë”, shtoi ai.
Megjithatë, raportime të kundërta nga gazetari italian Gianluca Di Marzio pretendojnë se Sloti “dëshiron ta shqyrtojë me kujdes” hapin e tij të ardhshëm.
Sipas të njëjtit burim, kalimi i tij te Milani tani duket shumë i pamundur, ndërsa ish-trajneri i Crystal Palacet, Oliver Glasner, dhe trajneri i kombëtares së SHBA-së, Mauricio Pochettino, vazhdojnë të lidhen me vendin vakant në klubin italian.
Milani e përfundoi sezonin e kaluar në vendin e pestë në Serie A, duke dështuar të kualifikohet në Ligën e Kampionëve për të dytin vit radhazi.
Gjatë karrierës së tij si trajner, Sloti ka drejtuar klubet holandeze Cambuurin, AZ dhe Feyenoordin.
