Strachan sfidon Rashfordin

Futboll

Strachan sfidon Rashfordin

Më: 2 shtator 2026 Në ora: 20:07
Marcus Rashford

Marcus Rashford nuk mund të jetojë më me atë që ka bërë në të kaluarën dhe duhet të dëshmojë se është ende një lojtar vendimtar për Manchester Unitedin.

Ky është mesazhi i ish-mesfushorit të “Djajve të Kuq”, Gordon Strachan, i cili ka kërkuar nga 28-vjeçari që të marrë më shumë përgjegjësi dhe t’ia lehtësojë barrën kapitenit Bruno Fernandes.

Rashford është rikthyer në “Old Trafford” pas huazimit te Barcelona dhe tashmë pritet të luajë një rol të rëndësishëm në sezonin 2026/27.

Rashford rikthehet te United pas huazimit te Barcelona

Bruno Fernandes vazhdon të jetë figura kryesore e Manchester Unitedit.

Portugezi hyri në historinë e Premier League sezonin e kaluar me 21 asistime dhe prej vitesh është lojtari që shpesh e mban skuadrën mbi supe në momentet më të vështira.

United ka edhe futbollistë të tjerë cilësorë, por shumë prej tyre kanë vuajtur nga mungesa e vazhdimësisë në paraqitje.

Nëse klubi dëshiron të rikthehet në garën për trofetë më të mëdhenj në Angli dhe Evropë, kjo duhet të ndryshojë.

Rashford pritet të jetë një prej lojtarëve që duhet ta ndihmojnë skuadrën ta bëjë këtë hap.

Pas huazimeve te Aston Villa dhe Barcelona, ai rikthehet në Manchester me një eksperiencë të madhe në klub.

Rashford ka zhvilluar 428 ndeshje me fanellën e Unitedit dhe ka shënuar 128 gola.

Vetëm tri vite më parë, gjatë sezonit 2022/23, ai realizoi 30 gola në të gjitha garat.

Megjithatë, pas atij sezoni niveli i tij ra ndjeshëm, edhe pse më pas nënshkroi një kontratë shumë të pasur.

Gjatë afatit të fundit kalimtar nuk pati ndonjë interes konkret për të, ndërsa Rashford hyn në dy vitet e fundit të kontratës së tij, nga e cila përfiton rreth 325 mijë funte në javë.

Strachan: Nuk mund të transferosh një lojtar për atë që ka bërë dy vite më parë

I pyetur nëse ishte befasuar nga mungesa e interesimit për Rashfordin gjatë merkatos, Gordon Strachan deklaroi se kjo nuk ishte aspak e papritur.

“Nuk më befason. Futbolli dhe transferimet janë shumë të lidhura me atë që po ndodh tani”, tha ai për GOAL.

Sipas Strachanit, klubet nuk mund të shpenzojnë shuma të mëdha duke u bazuar vetëm në atë që një futbollist ka bërë disa vite më parë.

“Nuk mund të transferosh lojtarë për atë që kanë bërë dy vite më parë. Me Marcus Rashfordin dhe pagën që ai merr, kur paguan aq shumë, futbollisti duhet të garantojë sukses.”

Strachan theksoi edhe faktin se Rashford vazhdon të tërheqë shumë vëmendje mediatike, gjë që mund të krijojë presion të vazhdueshëm edhe për trajnerin.

“Nëse nuk luan, menjëherë pyetet: pse nuk po luan Rashford? Çfarë po ndodh? Pse nuk është në skuadër? Gjithçka bëhet rreth tij.”

Ai përdori edhe periudhën e Rashfordit te Barcelona si argument.

“Shkon te Barcelona, dhe jo te Barcelona e kohës së Xavit dhe Messit, por te një skuadër e mirë e Barcelonës, dhe përsëri nuk arrin të sigurojë vend të rregullt. Praktikisht ka qenë rezervist për një periudhë të gjatë. A e dëshiron vërtet një lojtar të tillë në ekipin tënd?”

Sipas Strachanit, problemi kryesor për Rashfordin është se reputacioni i tij vazhdon të lidhet me formën që kishte disa vite më parë.

“Tashmë i takon Marcus Rashfordit ta zgjidhë këtë situatë dhe të merret vetë me të. Ai duhet të bëhet lojtar i së tashmes dhe jo lojtar i dy apo tri viteve më parë.”

Strachan theksoi se futbolli modern kërkon rezultate të menjëhershme.

“Shikon lojtarë që transferohen për 45 apo 60 milionë dhe ndoshta nuk ke dëgjuar asnjëherë për ta. Por ata janë lojtarë të momentit. Klubet duan rezultate tani.”

Megjithatë, ish-mesfushori i Unitedit nuk ka dyshime për talentin e Rashfordit.

“Ai ka talent, absolutisht. Por detyra e tij është të shënojë gola dhe të krijojë gola.”

Fernandes ka nevojë për më shumë ndihmë

Strachan beson se Rashford dhe pjesa tjetër e skuadrës duhet të marrin më shumë përgjegjësi për ta ndihmuar Bruno Fernandesin.

“Besoj se Bruno Fernandes zgjohet në mëngjes para një ndeshjeje dhe mendon: ‘Shpresoj që sot dikush tjetër të shënojë më shumë gola ose të krijojë më shumë raste, sepse gjithmonë duhet ta bëj unë’.”

Sipas Strachanit, ky duhet të jetë momenti që lojtarë si Rashford të reagojnë.

“Rashford dhe të tjerët duhet të thonë: ‘E kemi lënë këtë djalë t’i bëjë të gjitha. Tani dua të bëj edhe unë diçka’.”

Strachan pranoi se nuk është i sigurt nëse Rashford e ka ende të njëjtën uri konkurruese që kishte dikur.

“Nuk e di nëse ende e ka atë ndjenjën: dua të jem lojtari më i mirë në fushë, dua ta vendos unë ndeshjen. Nuk e di nëse ajo energji është ende aty.”

Megjithatë, ai shpreson se anglezi do të rikthehet në nivelin e tij më të mirë.

“Shpresoj të jem gabim. Shpresoj të bëjë shumë mirë, sepse duket se është një djalë i mirë.”

Rashford mbetet pjesë e planeve të Carrickut

Rashford është aktivizuar në të dyja ndeshjet e para të Manchester Unitedit në sezonin e ri të Premier League.

Ai hyri nga stoli në humbjen 2-0 ndaj Hull City, ndërsa më pas ishte titullar në fitoren 5-2 në shtëpi ndaj Ipswich Town.

Afati kalimtar është mbyllur pa u realizuar largimi i tij, që do të thotë se Rashford do të mbetet në dispozicion të trajnerit Michael Carrick të paktën deri në janar.

Manchester United do të rikthehet në aksion të dielën, kur do të udhëtojë në Merseyside për t’u përballur me Evertonin.

Sot mund të lexoni Shfletoni kopertinat