Real Madridi ka marrë masa të ashpra ndaj mbrojtësit Raul Asencios, pavarësisht rikthimit të tij të fundit në skuadër, pas problemeve të fundit ligjore që kanë dëmtuar reputacionin e klubit.
Sapo Asencio u rikuperua nga dëmtimi, Jose Mourinho e grumbulloi për ndeshjen e së shtunës ndaj Rayo Vallecanos, grumbullimi i tij i parë këtë sezon, duke i hapur derën për një rikthim në fushë.
Pas këtij vendimi sportiv qëndron një masë e ashpër disiplinore.
Sipas uebsajtit spanjoll “Defensa Central”, Real Madridi e ka gjobitur lojtarin me një shumë të konsiderueshme, e cila do t’i zbritet nga paga gjatë muajve të ardhshëm.
“Asencio tashmë ka marrë gjobën financiare nga Real Madridi pas procedurës disiplinore që u hap ndaj tij”, konfirmoi uebsajti spanjoll.
“Shuma është afër 100,000 eurove”, thuhet tutje.
Raporti zbuloi se drejtuesit e Real Madridit nuk morën parasysh vetëm shkeljen e trafikut nga lojtari.
Shqetësimi i tyre kryesor ishte dëmi i konsiderueshëm që iu shkaktua reputacionit të klubit.
Koha kur ndodhi incidenti ndikoi që dënimi të ishte më i ashpër.
Asencio u kap duke drejtuar makinën e tij në mes të natës, një sjellje që klubi e konsideroi të papërgjegjshme nga një futbollist profesionist.
Me këtë vendim, Real Madridi i ka dërguar një mesazh të qartë dhe të dyfishtë mbrojtësit spanjoll.
Mourinho i ka dhënë atij një mundësi të shpejtë për t’u rikthyer dhe për ta dëshmuar veten.
Megjithatë, brenda klubit është bërë e qartë se nuk do të tolerohet asnjë veprim që dëmton imazhin e tij, madje as nga një prej lojtarëve të vet.
Asencio tani duhet të përqendrohet dhe të luftojë për t’u rikthyer në konkurrencë.
Ai përballet me konkurrencë të fortë për vendin e tij pas mungesës, përveç humbjes prej 100,000 eurosh në llogarinë e tij bankare.
