Një ndeshje shumë e fortë është zhvilluar të enjten mbrëma në palestrën “Minatori” në Mitrovicë.
Janë përballur Trepça e Besa Famgas, ndërsa skuadra pejane ka festuar në fund.
Ndeshjen e xhiros së 21-të të Superligës A (meshkujt), Besa e ka fituar me rezultatin 26:22.
Shkëputjen në rezultat, kampionia në fuqi e ka bërë vetëm në minutat e fundit.
Pas fillimit të barabartë, Trepça krijoi epërsi prej dy golash (5:3, 6:4, 7:5).
Loja ndryshoi kur Nikola Prce, që kryen edhe detyrën e trajnerit, u aktivizua te Besa, në minutat e fundit të pjesës së parë.
Pas 30 minutave lojë, rezultati ishte 10:10.
Pjesën e dytë më mirë e nisi Besa që shpejtë krijoi epërsi prej dy golash, 14:12.
Por rezultati u barazua në 14:14 e më pas në 15:15. Prapë Trepça kishte një periudhë të mirë duke udhëhequr me një gol e më pas me dy gola (18:16).
Në minutën e 49-të, vendasit kanë udhëhequr 20:19 e më pas mysafirët ishin përpara.
Në minutën e 55-të, Besa udhëhoqi 23:22, ndërsa vendasit lëshuan rastin për të barazuar. Deri në fund pejanët shënuan edhe tri herë për fitoren 26:22.
Denis Shabanoviq ishte më efikasi te Besa me gjashtë gola. Prce i shënoi pesë, ndërsa katër gola i realizoi Egzon Gjuka.
U dallua edhe portieri Mursel Memeti.
Te Trepça, Deniz Terziqi shënoi tetë gola, ndërsa gjashtë i kishte Sali Maxhera.
Të dy skuadrat kanë luajtur mbrojtje të fortë, ndërsa Besa ka vazhduar ecurinë pa humbje.
Besa Famgas udhëheq në tabelë me 37 pikë, ndërsa Trepça është e dyta me 24 pikë.
