Ministria e Infrastrukturës ka nënshkruar kontratë në vlerë prej 883 mijë e 484 euro për zgjerimin e rrugës nacionale N9, Prishtinë-Pejë, përkatësisht në segmentin Dollc–Zahaq, Loti 4.
Sipas njoftimit për nënshkrimin e kontratës, punët do të realizohen nga grupi i operatorëve ekonomikë “Lika Trade Sh.p.k.” dhe “Lika Company Sh.P.K.”, me adresë në Isniq të Deçanit.
Vlera e përgjithshme e kontratës është 883,484.48 euro, ndërsa financimi do të bëhet nga Buxheti i Konsoliduar i Kosovës.
Kontrata është nënshkruar më 27 tetor , ndërsa aktiviteti i prokurimit ishte iniciuar më 16 tetor.
Ajo që bie në sy në këtë aktivitet të prokurimit është se vetëm një operator ekonomik kishte dorëzuar ofertë dhe ajo ishte shpallur e përgjegjshme.
Procedura ishte zhvilluar përmes metodës së negociuar, ndërsa kriter për dhënien e kontratës ishte çmimi më i ulët.