Profesori Avzi Mustafa është i mendimit se për të zgjidhur çështjen e teksteve shkollore në Maqedoninë e Veriut duhet të krijohet një komision i gjerë me përfaqësues edhe nga Shqipëria dhe Kosova.
Në një intervistë për Euronews Albania me gazetaren Loneta Progni, Mustafa e cilësoi pozitive tërheqjen e tekstit të Gjeografisë së vitit të dytë gjimnaz, por jo të mjaftueshëm për zgjidhjen e problemit. Sipas tij nevojitet një punë më e gjerë dhe një shqyrtim i të gjitha teksteve “për fyerje apo denigrime ndaj shqiptarëve”.
Mustafa tha se “fyerja institucionale ndaj shqiptarëve nuk ka fund”. Ai tha se kjo vijon në mënyrë sistematike me enciklopedinë verio-maqedone, fjalorin linguistik dhe më pas tekstet shkollore. Në këtë pikë ai përmendi si problematike edhe tekstet e historisë dhe muzikës.
“Ka këngë vetëm maqedone në shqip [në tekstet e muzikës], edhe në tekstet e historisë ku na bëjnë hedhacakë, cuba, hajdutë me prejardhje ka mos...” – u shpreh profesor Mustafa duke kërkuar që të ketë më tepër ndërgjegjësim për këtë çështje.
Dy vite më parë në Shkup u ngrit një komision për të rishikuar tekstet shkollore ku të shikoheshin për gjuhën e përdorur. Mirëpo sipas Mustafës nuk pati rezultat deri këtë vit kur pas presioneve nga opozita dhe intelektualët u soll ky ndryshim.
“S’e di se si nuk turpërohen ministrat shqiptarë që e kanë udhëhequr me dekada këtë dikaster [të arsimit], kanë përmendur se do të ndërmarrin hapa për të përmirësuar tekstet, por asnjëherë nuk kanë gjetur një zgjidhje,” – u shpreh profesori përballë pyetjes se a do të duhet të mbajë përgjegjësi dikush për këtë çështje.
