Angellovska-Bezhoska: Me transparencë më të madhe deri në efektivitet më të madh të politikës monetare

Maqedonia

Angellovska-Bezhoska: Me transparencë më të madhe deri në efektivitet më të madh të politikës monetare

Më: 28 janar 2022 Në ora: 13:45
Anita Angellovska-Bezloska

Komunikimi i bankave qendrore është i rëndësishëm jo vetëm për transparencë dhe llogaridhënie, por edhe për ruajtjen e besueshmërisë, nga e cila varet zbatimi i suksesshëm i politikës monetare. Sa më mirë të kuptohen vendimet dhe masat, aq më shumë subjektet ekonomike do të sillen në mënyrën e pritshme dhe aq më lehtë do të arrihet qëllimi i bankave qendrore, tha guvernatorja e Bankës Popullore, Anita Angellovska-Bezloska në ligjëratën që e mbajti në kuadër të Programit të biznes-liderëve.

“Është e rëndësishme të informohemi qartë për vendimet monetare, arsyet e tyre dhe rreziqet kryesore, në mënyrë që të mund të veprohet mbi pritshmëritë dhe sjelljet e subjekteve ekonomike, dhe rrjedhimisht mbi efektivitetin e politikës monetare. Gjatë shpalljes së vendimeve të politikës monetare, është e rëndësishme të shpjegohet sa më mirë dhe pse janë marrë ato, pasi është e rëndësishme të kuptohen faktorët kryesorë nga të cilët varet politika monetare aktuale dhe e ardhshme. Me një kuptim më të mirë të procesit të marrjes së vendimeve monetare nga opinioni i gjerë, aktivitetet e politikës monetare monitorohen dhe vlerësohen më efektivisht”, tha Angellovska-Bezhoska.

Mënyra se si komunikojnë bankat qendrore ka pësuar ndryshime të mëdha, veçanërisht në dhjetë vitet e fundit, pas krizës financiare globale. Përveç transparencës dhe hapjes më të madhe ndaj komunikimit, ka ndryshuar edhe mënyra se si bankat qendrore shprehen në fjalimet e tyre. Në kuadër të këtyre ndryshimeve veçohet shembulli i Bankës Qendrore Evropiane, e cila që nga fillimi i krizës financiare globale e ka fokusuar komunikimin e saj në qëndrimin e ardhshëm të politikës monetare.

Banka Popullore informon se në periudhën e kaluar janë bërë përpjekje të konsiderueshme në rritjen e sasisë dhe cilësisë së komunikimit me opinionin, gjë që ka rritur transparencën dhe efektivitetin e politikave monetare. Vëmendje i kushtohet edhe edukimit financiar.

Lidhur me çështjen e mandateve të bankës qendrore, Angellovska-Bezhoska tha se në dekadën e fundit ka një trend global të zgjerimit të mandateve për të përfshirë më shumë synime, veçanërisht stabilitetin financiar, zgjerimin e detyrave para së gjithash në fushën e edukimit financiar dhe mbrojtjes së konsumatorëve, si dhe zgjerimi i instrumenteve të bankës qendrore.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat