Kryetari i Kuvendit të Republikës së Maqedonisë së Veriut, Talat Xhaferi, më 6 maj 2022 do të qëndrojë në Republikën e Shqipërisë ku do të marrë pjesë në Konferencën e XVIII të kryetarëve të parlamenteve të Nismës Adriatiko- Joniane (NAJ).
Në konferencën e rregullt e cila këtë vit organizohet nga Kuvendi i Republikës së Shqipërisë si kryesues i NAJ-it, krahas Kryetares së Kuvendit të Republikës së Shqipërisë, Lindita Nikollës në cilësinë e mikpritëses së evenimentit dhe Kryetarit Xhaferi, do të marrin pjesë edhe Kryetari i Parlamentit të Republikës së Sllovenisë, Igor Zorçiq, Nënkryetari i Dhomës përfaqësuese i Republikës së Italisë, Etore Rozato dhe përfaqësues të parlamentit grek, Këshillit të Lartë të Përgjithshëm të San Marinos, si edhe sekretari i përgjithshëm i NAJ-it, Xhovani Kastellaneta.
Gjatë Konferencës, pjesëmarrësit do të debatojnë në dy tema:
“Integrimi evropian: Ballkani Perëndimor, vlerë e shtuar e rajonit Adriatiko-Jonian dhe e Bashkimit Evropian” dhe “Kultura dhe turizmi si prioritet në bashkëpunimin ndërmjet vendeve të NAJ-it".
