Ushtarët britanikë të cilët shkaktuan incidente në Maqedoni, nuk do të përgjigjen penalisht

Maqedonia

Ushtarët britanikë të cilët shkaktuan incidente në Maqedoni, nuk do të përgjigjen penalisht

Më: 26 maj 2022 Në ora: 14:49

Trupat britanike, kontingjenti i të cilëve është pjesë e stërvitjes së fundit ushtarake të NATO-s në poligonin e Krivolakut, të cilët shkaktuan një sërë incidentesh në vend, sipas reagimit të Ministrisë së Mbrojtjes, nuk do të mbajnë përgjegjësi penale në vendin tonë.

Ministria e Mbrojtjes thotë se nisja e procedurave dhe sanksionimi i mundshëm i trupave të huaja është përgjegjësi e shteteve dhe institucioneve të vendeve nga vijnë trupat.

“Të gjitha trupat që vijnë nga vendet aleate për stërvitje dhe trajnime në Maqedoninë e Veriut bien nën marrëveshjen NATO SOFA – (Marrëveshja për Statusin e Forcave), e cila vlen për të gjitha vendet anëtare të Aleancës. Institucionet vendase që kanë detyrimin për ruajtjen e rendit dhe qetësisë publike dhe në rast të prishjes së tij mund të ndërhyjnë dhe të parandalojnë përshkallëzimin, por kompetenca e tyre është e kufizuar. Inicimi i procedurës dhe sanksioneve të mundshme është në kompetencë të shteteve dhe institucioneve të shteteve nga vijnë ushtarët”, thuhet në përgjigjen e Ministrisë së Mbrojtjes.

Ata shtojnë se në asnjë rast, MPB-ja nuk mund të ngrejë kallëzim penal ndaj tyre, pasi siç thonë ata, juridiksioni i tyre është i kufizuar, edhe pse në të kaluarën ka pasur grabitje veturash, thyerje restorantesh dhe sulme ndaj zyrtarëve.

Ndryshe, kontingjenti britanik është pjesë e stërvitjes shumëkombëshe “Përgjigje e shpejtë 22” në të cilën kryhen operacione ajrore. Në stërvitjen ushtarake në Krivolak marrin pjesë 4600 pjesëtarë të forcave të armatosura të tetë vendeve anëtare të NATO-s.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat