Me veprimet e saj, Republika e Maqedonisë së Veriut praktikisht bllokoi procesin e saj për hyrje në Bashkimin Evropian. Kështu deklaroi mbrëmë nënpresidentja bullgare Iliana Jotova për “Bg on air”.
Ajo u shpreh kategorike se Bullgaria do të qëndrojë pas çdo qytetari me vetëdije bullgare.
“Sulmet ndaj klubeve bullgare në Ohër dhe Manastir, rrahja brutale e Hristijan Pendikovit dhe me mosveprimin e saj në lidhje me ngjarjet antibullgare, vetë Republika e Maqedonisë së Veriut po e bllokon procesin e anëtarësimit në BE”, tha Jotova.
“Bullgaria do të shqyrtojë çdo akt dhe veprim në lidhje me gjuhën e urrejtjes. Fatkeqësisht, sot mund të themi se pavarësisht nga toleranca me të cilën e pranuam propozimin francez, nuk ka përparim as në punën e Komisionit për Histori. Sidomos pas ndryshimit të fundit në procedurat e anëtarësimit në BE, Bullgaria mund ta ndalë këtë proces në çdo moment dhe nëse vazhdojmë kështu, nuk jam optimiste”, shtoi Jotova.
Jotova mendon se Maqedonia e Veriut duhet të mbajë qëndrim të fortë kundër gjuhës së urrejtjes.
“Ne nuk shohim as një aluzion dhe as një qortim për ata, veçanërisht mediat, në Maqedoni që kohë më parë i kanë kaluar kufijtë e lirisë së fjalës dhe po bëjnë një fushatë jashtëzakonisht të ashpër bullgarofobike. Nuk dëgjojmë mesazhe të tilla nga autoritetet e vendit. Atëherë si mund të ndjehemi dhe të besojmë se po dënojnë atë që po ndodh në Maqedoni në raport me bullgarët atje”, pyeti ajo.
