EMV Furnizimi me Ngrohje njofton publikun dhe konsumatorët se, si pasojë e një defekti teknik në rrjetin distributiv të ngrohjes qendrore, në këto momente ka ndërprerje të furnizimit me energji ngrohëse në disa zona të qytetit. Ndërprerja prek konsumatorët në lagjet: Qendër, Aerodrom, Lisiçe e Re, Kisella Vodë dhe Autokomandë.
Nga kompania bëjnë të ditur se defekti është evidentuar në rrjetin distributiv dhe ka ndikuar në pamundësinë e dërgimit normal të energjisë ngrohëse drejt konsumatorëve në zonat e lartpërmendura. Menjëherë pas konstatimit të problemit, ekipet teknike të EMV Furnizimi me Ngrohje kanë dalë në terren dhe janë duke punuar intensivisht në lokalizimin e saktë të defektit, izolimin e pjesës së dëmtuar të rrjetit, si dhe ndërmarrjen e masave të nevojshme teknike për sanimin e tij.
Sipas informatës së publikuar në ueb-faqen zyrtare të kompanisë, të gjitha aktivitetet po realizohen me prioritet të lartë, me qëllim që furnizimi normal me energji ngrohëse të rikthehet sa më shpejt të jetë e mundur dhe me sa më pak pasoja për konsumatorët.
EMV Furnizimi me Ngrohje falënderon konsumatorët për mirëkuptimin dhe durimin e treguar gjatë kohës së ndërprerjes, duke siguruar se do të njoftojë me kohë publikun për çdo zhvillim të ri lidhur me sanimin e defektit dhe rikthimin e furnizimit normal.
Për informata shtesë, sqarime apo paraqitje të mundshme, konsumatorët mund të kontaktojnë Qendrën për Kujdes ndaj Konsumatorëve përmes numrave të telefonit: (02) 3076 200 dhe 075 400 100.
