Të flasësh për Shakirën pa përmendur flokët e saj është njësoj si të përpiqesh të përshkruash detin pa përmendur valët. Këngëtarja kolumbiane, e njohur në mbarë botën për zërin e saj karakteristik dhe energjinë shpërthyese në skenë, ka bërë nga kaçurrelat e saj një pjesë të pandashme të identitetit të saj artistik.
Ato janë më shumë se thjesht një stil — janë një deklaratë. Një përkufizim i lirshmërisë, i natyrshmërisë dhe i fuqisë femërore.
Prej vitesh, flokët e saj të gjata deri në vithe, me kaçurrela të mëdha dhe të fryra, janë shndërruar në një lloj “gjymtyre të pestë” gjatë performancave. Ato lëvizin në harmoni me trupin e saj dhe bëhen pjesë e gjuhës së saj skenike. Por, ndonëse janë kaq të dukshme dhe të adhurueshme, rutina e kujdesit të Shakirës për flokët ka mbetur një mister... deri tani.
Pas katër vitesh përdorimi të fshehtë, Shakira ka vendosur ta ndajë sekretin me publikun: Isima, linja e saj e re për kujdesin e flokëve. "Kjo linjë është e gjitha për mua, por jam e lumtur ta ndaj tani," i tha ajo revistës ELLE. Nuk është thjesht një markë tjetër, por një pasqyrim i përvojës personale, sfidave dhe dashurisë që ajo ka për flokët e saj natyralë.
Takimi im me të ndodhi në një pasdite të ngrohtë maji, në një nga suitat elegante të hotelit New York City Edition. Shakira u shfaq e veshur plotësisht me rozë të butë, nga pantallonat tek grimi, por ajo që binte më shumë në sy – si gjithmonë – ishin flokët e saj.
Të shohësh ato kaçurrela në foto është një gjë; t’i shohësh nga afër është një përvojë krejt tjetër. Spirale të përcaktuara, por të buta; aq të gjata sa ajo me shaka tha se mund të ulej mbi to. Ngjyra? Një miks perfekt nuancash mjalti, larg çdo ndjesie portokalli apo bronzi që shpesh shqetëson biondet natyrale me kaçurrela.
“Flokët e mi janë një udhëtim më vete,” tha ajo me një buzëqeshje. Dhe falë Isima, ky udhëtim tani është i hapur për të gjithë. Sepse në fund të fundit, të njohësh Shakirën do të thotë të njohësh flokët e saj – dhe gjithë fuqinë, autenticitetin dhe bukurinë që ato përfaqësojnë.
