15 ndeshje të luajtura mes kampionatit, Kupës së Italisë dhe Ligës së Kampionëve, 3 gola të shënuar dhe shumë probleme fizike, që shpesh e detyruan të ndalonte. Aventura e Angel Di Maria te Juventusi deri më tani ka qenë me ulje-ngritje.
Pasi mbërriti nën hijen e Mole për të bërë kapërcimin përfundimtar në cilësi, në një ekip të ndërtuar për t’u rikthyer te titulli, në muajt e tij të parë italianë dëshmoi se kishte goditjet e një kampioni absolut, por e ardhmja ende nuk është shkruar.
Kampioni i ri i botës është i aftë si pak të tjerë në Serie A të ndryshojë fytyrën e një ndeshjeje të tërë, por rikthimi në kapacitetin e plotë të Federico Chiesa, kontrata që skadon në fund të sezonit, gati 35 pranvera mbi supe (do t’i mbushë kaq vite në ditën e Shën Valentinit) dhe ato lëndime që jo gjithmonë e lejojnë të luajë me një ritëm të lartë gjatë gjithë lojës dhe të gjitha ndeshjeve, mund të çojnë në më shumë se një reflektim.
Në pjesën e dytë të sezonit, Di Maria mund të bëhet ‘njeriu i dymbëdhjetë’ perfekt, pra elementi i pajisur me cilësi të jashtëzakonshme për t’u përfshirë në garën në zhvillim, për të ndryshuar rrjedhën e saj, por mbetet për t’u kuptuar se çfarë roli do t’i jepet atij në sezonin e ardhshëm.
Muajt e ardhshëm do t’i shërbejnë atij dhe Juventusit për të krijuar një ide se si të vazhdohet, por shumë mund të varet edhe nga ngjarjet jashtë fushës. Heqja e 15 pikëve në kampionat e ka bërë rrugën e bardhezinjve drejt kualifikimit në Champions League të përpjetë.
Pa të ardhurat e garantuara nga Kupat e Europës, që kanë rëndësi, mund të jetë më e ndërlikuar për klubin të menaxhojë një numër të madh kontratash të rëndësishme (Di Maria merr një nga pagat më të mëdha të të gjithë skuadrës dhe kështu do të ishte edhe në rast rinovimi të mundshëm).
Rreziku është që Di Maria të bëhet një ‘luks’, por padyshim, asnjëherë si në këtë rast, çdo fjalim rrezikon të rezultojë i parakohshëm. E sigurt është se Juventusi tani ka nevojë për një Di Maria në më të mirën e tij.
Pasuria e tij e madhe e cilësisë dhe përvojës mund të jetë vendimtare në “Europa League” (një turne që ofron kalimin e fituesit në Champions League), në Kupën e Italisë (Juve tashmë ka fituar një vend në gjysmëfinale) dhe padyshim në periudhën afatgjatë që çon në një kualifikim evropian nëpërmjet kampionatit.
