Paul Pogba këmbëngul se ambicia e tij afatgjatë mbetet rikthimi në kombëtaren e Francës, pavarësisht periudhës së vështirë të shoqëruar me lëndime te Monaco.
Mesfushori ka luajtur vetëm pak minuta që nga rikthimi i tij në Ligue 1, por thotë se prioriteti i tij kryesor mbetet rikthimi në formën e plotë fizike dhe arritja sërish e nivelit më të lartë.
Pogba iu bashkua Monacos verën e kaluar me shpresën për të rindërtuar karrierën e tij pas pothuajse tri vitesh pasivitet, të shkaktuara nga një dënim për doping dhe një sërë problemesh fizike.
Megjithatë, rikthimi i tij në futbollin konkurrues është penguar nga probleme të tjera me gjendjen fizike.
33-vjeçari ka zhvilluar vetëm gjashtë paraqitje për Monacon, duke grumbulluar vetëm 115 minuta në fushë.
Pavarësisht mungesës së minutave, Pogba e sheh rikthimin e tij në një ambient profesional si një hap të rëndësishëm pas periudhës së vështirë që përfshiu çështjen e dopingut dhe një skandal shantazhi ku ishin të përfshirë anëtarë të familjes së tij.
Fokusi i tij mbetet rikuperimi fizik dhe krijimi i vazhdimësisë në paraqitje përpara se të synojë arritje më të mëdha në fushë.
Duke reflektuar mbi transferimin te Monaco dhe mungesën e tij në skuadrën e Francës për Kupën e Botës 2026, Pogba theksoi se përfaqësimi i kombëtares nuk ishte objektivi kryesor pas rikthimit të tij.
“Nuk erdha te Monaco duke menduar: ‘Jam këtu për të luajtur në Kupën e Botës’.
Kishte kaluar një kohë shumë, shumë e gjatë që kur kisha luajtur. Qëllimi im ishte thjesht të rikthehesha në garë, të rikthehesha në një gjendje të mirë fizike, dhe kaq. Më pas, nëse kjo do të kishte ndodhur, do të ishte një bonus”, tha ai për “L’Equipé”.
Ndërsa rikthimi i Pogbas është ngadalësuar nga problemet e përsëritura fizike, ai e ka bërë të qartë se nuk ka hequr dorë nga dëshira për të përfaqësuar sërish Francën.
Mesfushori beson se çelësi për një rikthim në kombëtare është fillimisht të dëshmojë veten në aspektin fizik në nivel klubi.
“Kam bërë një rrugë të gjatë, ndaj nuk është sikur nuk e prisja këtë,” pranoi ai.
“Ajo që më mungonte ishte ritmi. Nuk do të flasim për aspektin teknik, sepse trajnerët dhe lojtarët e shohin këtë në stërvitje.
Është më shumë çështja fizike, sidomos kur ke kaluar një seri lëndimesh, përfshirë ato para pezullimit (për doping, mes viteve 2023 dhe 2025). Më duhet të ndihem mirë”, shtoi Pogba.
“Kjo është ajo që më duhet për t’u rikthyer në nivelin më të lartë. Kombëtarja e Francës është një bonus.
Për çdo lojtar, është një ëndërr. Ende është ëndrra ime të vazhdoj ta vesh atë fanellë. Dhe duhet ta fitosh atë”, e mbylli francezi.
