Buxheti për vitin 2022, Lladrovci: Qeveria po diskriminon Drenasin, nuk janë përfshirë projektet kryesore

Kosova

Buxheti për vitin 2022, Lladrovci: Qeveria po diskriminon Drenasin, nuk janë përfshirë projektet kryesore

Më: 21 dhjetor 2021 Në ora: 11:46
Ramiz Lladrovci

Kryetari i Drenasit, Ramiz Lladrovci ka thënë se nuk është aspak i kënaqur me ndarjen buxhetore të Qeverisë për komunën e Drenasit, për vitin 2022.

Lladrovci ka thënë se kërkesat e komunës kanë qenë reale dhe të arritshme, mirëpo ato nuk janë miratuar nga niveli qendror në buxhetin e vitit 2022.

Sipas tij, aty nuk figurojnë projektet kryesore të Komunës, që  kanë qenë në listë të projekt-buxhetit dhe kanë pasur edhe kodin e buxhetimit, si këtë vit, ashtu edhe vitin e kaluar.

“Kërkesat e Komunës së Drenasit, kanë qenë reale dhe të arritshme, mirëpo ato nuk janë të miratuara në buxhetin e vitit 2022 nga niveli qendror. Nuk jemi aspak të kënaqur me ndarjen e buxhetit për vitin e ardhshëm, sepse nuk figurojnë projektet kryesore të Komunës, që janë kërkesa jetike, madje ato kanë qenë në listë të projekt-buxhetit dhe kanë pasur edhe kodin e buxhetimit, si këtë vit edhe vitin e kaluar”, ka thënë Lladrovci.

Kryetari i Drenasit ka thënë se kjo nuk është hera e parë që niveli qendror diskriminon Komunën e Drenasit me ndarjen e buxhetit për investime kapitale. Kjo sipas tij ka ndodhur edhe në vitin 2020 e 2021, kur Lladrovci ka thënë se Komunës së Drenasit i kanë hequr mbi 1 milion euro për investime.

“Nuk është hera e parë, që niveli qendror diskriminon Komunën e Drenasit me ndarjen e buxhetit për investime kapitale. Edhe në vitin 2020, Komunës së Drenasit i kanë hequr mbi 1 milion euro për investime e po ashtu edhe në ligjin e buxhetit për këtë vit (2021) nuk figurojnë 1 milion euro për investime”, u shpreh Lladrovci.

Ai ka përmendur edhe projektet që kanë pësuar nga ndarja buxhetore për komunën e Drenasit nga niveli qendror.

“Në buxhetin e miratuar nga niveli qendror dhe një buxhet që kalon procedurat e aprovimit në Kuvendin e Kosovës, ai pastaj behët edhe Ligj dhe këtë niveli qendror nuk e ka zbatuar ligjin. Në këtë ligj të buxhetit për vitin 2022, rruga me katër korsi Komoran-Drenas-Skenderaj, mjetet e ndara nga ky buxhet janë vetëm 500 mijë euro, ndërsa kërkesat e komunës dhe me buxhetin fillestar të vitit 2021, kanë qenë të parapara 3 milion, mirëpo ajo shumë është zvogëluar në vitin 2021 me rishikim në 500 mijë euro dhe e njëjta nuk është implementuar, mirëpo e njëjta shumë është paraparë për vitin 2022. Në ligjin e buxhetit të vitit 2022, nuk figuron projekti për ndërtimin e pendës për grumbullimin e ujërave në fshatin Vërboc, që ka qenë e paraparë mbi 1 milion, por nuk është implementuar. Në ligjin e buxhetit nuk figurojnë edhe shumë projekte të tjera në shuma më të vogla, të cilat kanë qenë në listën e projekteve kapitale dhe kanë pasur edhe kodin buxhetor, por nuk janë pjesë e buxhetit të vitit 2022 (si Stadiumi Nacional, fusha sintetike në Komoran dhe projekte të tjera).”, u shpreh Lladrovci.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat