Dokumente të falsifikuara për prona në Kosovë, shtetasja maqedonase akuzohet për mashtrim prej 320 mijë eurosh

Kronikë

Dokumente të falsifikuara për prona në Kosovë, shtetasja maqedonase akuzohet për mashtrim prej 320 mijë eurosh

Nga: A.M. Më: 19 nëntor 2026 Në ora: 11:36
Fotoilustrim

Prokuroria Themelore në Ferizaj ka ngritur aktakuzë ndaj një shtetaseje të Maqedonisë së Veriut, e cila dyshohet për mashtrim dhe legalizim të përmbajtjes së rreme, përmes dokumenteve të falsifikuara për shitjen e pronave në Kosovë.

Sipas njoftimit të Prokurorisë, e pandehura dyshohet se ka përdorur autorizime të falsifikuara, kinse të lëshuara nga xhaxhai i saj, për të shitur pronat e tij që ndodhen në Kosovë.

Rasti përfshin disa transaksione pronësore në Ferizaj dhe Shtime, transmeton "Bota sot".

Sipas aktakuzës, më 13 nëntor 2024, e pandehura dyshohet se ka përdorur dokumente të falsifikuara në Gjykatën Themelore në Ferizaj, përmes të cilave një personi i është njohur e drejta e pronësisë mbi disa parcela në zonën kadastrale Petroviq të Shtimes.

Prokuroria pretendon se mashtrimi kishte nisur edhe më herët. Gjatë vitit 2016, e pandehura dyshohet se kishte bindur një person se kishte autorizim për shitjen e një prone, duke përfituar para përmes pagesave në llogarinë e saj bankare. Në këtë rast, të dëmtuarit i është shkaktuar dëm prej 200 mijë eurosh.

Ndërkaq, në vitin 2018, ajo dyshohet se ka mashtruar edhe një person tjetër përmes një para-kontrate për shitblerjen e pronës, duke i shkaktuar dëm pasuror prej 120 mijë eurosh.

Në total, dëmi i pretenduar nga Prokuroria në këto dy raste të mashtrimit arrin në 320 mijë euro.

Prokurori i rastit i ka propozuar Gjykatës që, pas shqyrtimit gjyqësor dhe administrimit të provave, të pandehurën ta shpallë fajtore dhe ta dënojë sipas ligjit për veprat penale për të cilat akuzohet.

Sot mund të lexoni Shfletoni kopertinat