Trajneri i Manchester Utd, Ole Gunar Solskjaer, nuk u shfaq mjaft i kënaqur për paraqitjen e “Djajve të Kuq” përballë Liverpoolit në kampionatin anglez. 47-vjeçari norvegjez theksoi se në tërësi, barazimi e kënaq, por do ta gëzonte akoma më shumë nëse do të fitonte ndeshjen e radhës në Premier Ligë.
Ndër të tjera, Solskjaer shtoi se skuadra e tij mund të përmirësohet akoma më shumë në lojë.
“Përshtypja nga ndeshja – Nuk mendoj se luajtëm mjaft mirë. Nuk iu imponuam kundërshtarit në pjesën e parë. Krijuam dy raste të shkëlqyera, por portieri Alison bëri pritje fantastike.
Çfarë duhet të përmirësojë Manchester Utd – Mund të luajmë më mirë se kaq, e dimë këtë gjë. Mund të kombinohemi më mirë, të kontrollojmë më shumë topin. Gabuam në disa momente duke i dhënë topin rivalit dhe në markim pas. Ka disa gjëra që duhet t’i përmirësojmë.
Pogba në krahun e djathtë – Ishte i shkëlqyer sot. Bllokoi dhe prishi aksione në krah dhe na ndihmoi për të markuar Robertsonin.
Shans i humbur ky barazim – Të jem i sinqertë, po. Megjithëse, luajtëm kundër një kundërshtari fantastik, ata kontrolluan më shumë topin. Një pikë mund të jetë mjaft mirë nëse fitojmë ndeshjen tjetër.
Duhej më shumë guxim – Varet se çfarë doni të thoni. Mbase në qarkullim topi. Do ta nisja po me të njëjtin formacion, nëse e keni fjalën për guxim”, përfundoi trajneri i Mançester Junajtid, Ole Gunar Solskjaer.
