Mbrojtësi i Milanit, Fikayo Tomori beson se viti 2021 ishte viti më i mirë i karrierës së tij, por paralajmëron bashkëlojtarët e tij për Romën dhe sulmuesin e tyre Tammy Abraham.
Tomori iu bashkua Milanit në një marrëveshje fillestare huazimi nga Chelsea një vit më parë. Kuqezinjtë megjithatë e blenë përfundimisht për 25 milionë euro në verë.
Ish-mbrojtësi i Chelsea foli për vitin e tij të parë në Milanello në një intervistë për Milan TV.
“Ndoshta ka qenë viti më i mirë i karrierës sime, kam arritur të luaj për Milanin, në Champions League, jam i kënaqur me gjithçka, klubin, qytetin, tifozët”, tha ai.
“Jam vërtet i lumtur. Ka kaluar tashmë një vit, është çmenduri.”
Nesër, kuqezinjtë presin Romën e Jose Mourinhos në San Siro. Në fund të tetorit, skuadra e Stefano Piolit fitoi ndeshjen e parë 2-1 në Olimpico.
“Roma është një skuadër shumë e mirë, ata po luftojnë për një vend në Champions League. E dimë që duhet të jemi gati, presim një lojë të vështirë, por nëse luajmë në mënyrën më të mirë kemi shanse të mëdha për të fituar. E njoh shumë mirë Tammy Abraham, kështu që e di rrezikun që ai mund të sjellë.
Duhet t’i ndalojmë ata dhe të luajmë lojën tonë në mënyrë që të fitojmë”, përfundoi intervistën e tij mbrojtësi anglez.
