Sulmuesi i Manchester Cityt, Gabriel Jesus, ka refuzuar të përjashtojë një largim eventual nga “Etihad” këtë verë, mes lidhjeve me ekipin tjetër të Premier Ligës, Arsenalin.
25-vjeçari ka bërë 35 paraqitje për skuadrën e Pep Guardiolës këtë sezon, duke shënuar 11 gola dhe ky numër u rrit ndjeshëm të shtunën, kur ai shënoi katër gola kundër Watfordit.
Megjithatë, Man City ka qenë shumë i lidhur me Erling Braut Haaland të Borussia Dortmundit dhe ardhja e tij në Manchester mund të kufizojë ndjeshëm kohën e lojës për Jesus.
Duke folur për të ardhmen e tij, Jezus u tha gazetarëve: "Nuk është koha për të menduar për këtë. Ju prisni që unë ta them këtë, por është e vërtetë. Nuk është koha për të menduar për këtë. Tani është momenti më i mirë i sezonit. Unë dua të shijoj , të jem i fokusuar te skuadra ime, me shokët e skuadrës, për të luftuar për titullin e kampionit në Premier Ligë”.
"Unë e fitova atë me shokët e mi tre herë. Dhe e di se si është ndjenja dhe dua ta kem përsëri atë ndjenjë. Dhe pastaj sigurisht që kemi edhe ndeshjen e vështirë të martën kundër Real Madridit në Ligën e Kampionëve dhe kjo është fokusi im”, vazhdoi më tutje braziliani.
"Nuk jam vetëm unë, janë të gjithë lojtarët. Nëse pyet, të gjithë do të thonë 'dua të luaj' dhe sezonin që erdha këtu kam luajtur shumë”, tha në fund ai.
Që kur mbërriti te Man City në vitin 2016, Jesus ka shënuar 93 gola dhe ka regjistruar 46 asistime në 230 paraqitje për klubin.
