Nisur nga emri i tij – Viktor Gomez – gjithkujt mund t’i shkojë mendja se bëhet fjalë për ndonjë portugez a brazilian. Por në fakt, Viktor Gomez, gjyqtari që do të vërë drejtësi në takimin mes Japonisë dhe Spanjës është nga Afrika e Jugut.
Ai ka lindur në Johanesburg dhe shumë shpejt pritet të mbushë 40 vjeç. Ai drejton në arenën ndërkombëtare që nga viti 2011-të, teksa debutoi në Kupën e Botës në suksesin 4-1 të Francës përballë Australisë. Por nëse është pak i njohur në Europë, krejt ndryshe ndodh me emrin e tij në Afrikë. Ai njihet nga një gjithë si një personalitet, ndonëse nuk i ka shpëtuar dhe përfshirjes në polemika, veçanërisht në Afrikën e Jugut, ku e kanë kritikuar për mënyrën e tij të arbitrimit.
Por famën më të madhe, Viktor Gomez e mori në vitin 2018-të, katër vjet të shkuara nga Botërori i Katarit. Si një nga gjyqtarët e elitës së Afrikës, ai u caktua të drejtonte takimin e vajtjes në kupën e kampionëve të Afrikës mes klubit Plato Junajtid (Nigeri) dhe USM (Algjeri). Teksa gjithçka bëhej gati të fillonte, gjyqtari Gomez komunikoi me federatën e Afrikës së Jugut duke i bërë me dije se i ishin ofruar 30 mijë dollarë për të manipuluar ndeshjen.
Menjëherë pas këtij njoftimi Federata Afrikano-jugore e Futbollit i doli në krah gjyqtarit të saj, duke e marrë si shembull kundër korrupsionit në futbollin afrikan. Nga hetimet e mëvonshme të bëra rezultoi se tentativa e blerjes së gjyqtarit ishte bërë nga kompanitë e basteve.
Nisur nga kjo situatë gjyqtari nga Afrika e Jugut kishte vendosur të largohej nga arbitrimi, por për pacenueshmërinë e figurës së tij, ai u mandatua të drejtonte finalen e Kupës së Kombeve të Afrikës në vitin 2021 mes Senegalit dhe Egjiptit në Kamerun. Ndërkohë, që tani do të drejtojë dhe në Botëror, “një ëndërr fëmijërie” për të.
