Dinamo e Zagrebit e nisi fazën e ligës në Europa League me një barazim 0:0 ndaj Hapoel Beer Shevas.
Kampioni izraelit ishte vendas zyrtar, por për shkak të situatës së sigurisë ndeshja u zhvillua në stadiumin Giulești në Bukuresht.
Futbollisti Arbër Hoxha u paraqit 63 minuta për Dinamon.
Dinamo udhëtoi drejt Rumanisë pa Dion Dren Beljo dhe Stjepan Radeljiq, të cilët ishin të sëmurë.
Problemi i parë i madh për Dinamon erdhi në minutën e 24-t, kur Lukas Kaçavenda u dëmtua dhe u detyrua të largohej nga loja.
Vetëm dy minuta më vonë, Hapoel ishte shumë pranë golit. Forson Amankwah goditi fuqishëm nga rreth 20 metra, por topi përfundoi në shtyllë.
Pas kësaj, izraelitët patën më shumë posedim dhe më lehtë depërtuan në gjysmën e fushës së Dinamos.
Në fund të pjesës së parë, Zahi Ahmad rrezikoi me një goditje nga skaji i zonës së rreptësisë, por portieri Dominik Kotarski dhe mbrojtja e Dinamos ruajtën rezultatin 0:0.
Dinamo pati rastin më të mirë në fillim të pjesës së dytë
Rasti më i mirë i Dinamos erdhi menjëherë pas pushimit.
Në minutën e 47-të, Dinamo doli në kundërsulm. Mislav Orshiç goditi fuqishëm nga një kënd i vështirë, por portieri i Hapoelit, Ofir Marciano, e priti goditjen.
Më pas përsëri rrezikoi skuadra vendase. Helder Lopes harkoi nga krahu i majtë, ndërsa Igor Zlatanoviç goditi me kokë nga afërsia. Kotarski reagoi shkëlqyeshëm dhe përsëri e shpëtoi Dinamon.
