Kombëtarja e Kosovës në Slloveni për ndeshje përgatitore

Hendboll

Kombëtarja e Kosovës në Slloveni për ndeshje përgatitore

Më: 30 korrik 2022 Në ora: 15:29
Kombëtarja e Kosovës

Pas fazës së suksesshme përgatitore në Gjakovë, Kombëtarja U18 e Kosovës në hendboll ka udhëtuar për në Slloveni ku do t’i vazhdojë përgatitjet për Evropianin e muajit të ardhshëm.

Hendbollistët tanë tashmë janë vendosur në Rogashka Sllatina të Sllovenisë.

Të shtunën e kanë luajtur ndeshjen e parë përgatitore me Arabinë Saudite. Ishte në fakt kjo edhe ndeshja e parë e kësaj gjenerate të Kosovës U18. Rrjedhimisht fillimi i ndeshjes nuk ishte i mirë, por më pas ka pasur përmirësime të ndjeshme në lojën e djemve tanë. Arabët kanë fituar me nëntë gola dallim, ndërsa në shtabin teknik ka shpresë të madhe se paraqitja do të jetë dukshëm më e mirë në tri ndeshjet tjera.

Kosova U18 e luan edhe një ndeshje me Arabinë Saudite, ndërsa dy ndeshje i ka me Kuvajtin. Edhe Arabia Saudite e Kuvajti paraqiten me U18.

Ndeshjet miqësore vlerësohen të domosdoshme për përgatitje sa më të mirë për Evropianin që mbahet në Letoni prej 8 deri më 14 gusht. Në Kombëtaren U18 shumica janë lojtarë 16-vjeçarë, por me potencial.

Miqësoret në Slloveni, por edhe Evropiani në Letoni, do të jenë përvojë shumë e rëndësishme për karrierën e këtyre lojtarëve në hendboll.

Në Evropianin e Divizionit B, Kosova është në grup me Maqedoninë e Veriut, Letoninë e Turqinë.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat