Rahoveci gati për spektaklin! Afrim Deliu: E kemi nje finale të fortë

Hendboll

Rahoveci gati për spektaklin! Afrim Deliu: E kemi nje finale të fortë

Kemajl Goca Nga Kemajl Goca Më 16 maj 2025 Në ora: 20:07
Afrim Deliu

Rahoveci po përgatitet për finalen e parë të play-off-it të Kampionatit të Kosovës në hendboll (meshkujt).

Djelmoshat e Rahovecit do të përballen me skuadrën me renome Kastriotin e Ferizajt, fitues i Kupës së Kosovës.

Kampioni në fuqi ka përparësinë e terrenit kundër Kastriotit.

Drejtuesit e KH Rahovecit janë gati për një finale madhështore ashtu siç i ka hije në tërësi hendbollit në shtetin tonë.

Finalja e parë luhet të dielën (më 18 maj) në orën 19.00 në palestrën “Mizahir Isma” në Rahovec.

Drejtori i sportiv i KH Rahovecit, Afrim Deliu, tha se se qysh më herët kanë filluar përgatitjet për finalen e madhe.

“Përgatitjet për finalen e madhe kanë filluar nga momenti i fitores ndaj Prishtinës. 

Ne jemi të vendosur që të vazhdojmë arritjet e jashtëzakonshme - në edicionin paraprak kemi shkruar historinë e sportit rahovecas, duke u bërë ekipi i parë i sporteve kolektive që shpallet kampion i Kosovës. 

Kjo do të jetë baza jonë dhe mbi këtë duam të punojmë”, thotë Deliu për gazetën kombëtare “Bota sot”.

Qyteti që po jeton me hendbollin, mezi e pret përballjen e parë finale.

Deliu thotë se Kastrioti është e vetmja skuadër që nuk e mposhten katër herë në edicionin e rregullt.

Rahoveci ka tri fitore e një barazim në garën e rregullt ndaj Kastriotit. 

“Sigurisht, e kemi përballë një kundërshtar aspak të lehtë, Kastriotin, skuadrën e vetmë që nuk e mposhtëm 4 herë në sezonin e rregullt, pasi e arritën një barazim ndaj nesh si dhe na eliminuan në Kupën e Kosovës.

Mirëpo, cilësitë e kundërshtarit veçse na motivojnë për të treguar veten e sjellur trofeun e radhës në Rahovec. 

Ne si ekip jemi gati, nga stafi e tek lojtarët dhe tifozet tanë, e kemi nje finale të fortë dhe besoj që do të japim gjithçka për të vazhduar me suksesin e radhës”, ka përfunduar Deliu.

Rahoveci synon titullin e dytë rresht të kampionit të Kosovës.

Mbrëmë kanë arritur marrëveshjen edhe me hendbollistin më të mirë në vendin tonë, Egzon Gjuka.

comment Për komente lëvizni më poshtë
Sot mund të lexoni Shfletoni kopertinat