Për 12 vite sa qëndroi në postin e presidentit të Federatës së Hendbollit të Kosovës, Eugen Saraçini do të mbetet një nga figurat më interesante dhe më frytdhënëse në historinë e këtij sporti në vend.
Gjatë tri mandateve të tij në krye të FHK-së, u shënuan tri arritje të mëdha.
Saraçini mbahet mend edhe për qetësinë e tij, edhe kur kritikohej, ai nuk reagonte, duke thënë se secili ka mendimin dhe opinionin e vet në këtë botë demokratike.
Së bashku me sekretarin e përgjithshëm të ndjerë, Izet Gjinovci (i cili ndërroi jetë më 5 gusht 2024), Saraçini realizoi tri gjera të mëdha.
E para, më 21 shtator 2014, në Dublin të Republikës së Irlandës, Kosova u pranua si anëtarja e 50-të me të drejta të plota në Federatën Evropiane të Hendbollit (EHF).
E dyta, më 7 nëntor 2015, në Sochi të Rusisë, Federata e Hendbollit e Kosovës (FHK) u pranua me të drejta të plota në Federatën Ndërkombëtare të Hendbollit (IHF).
E treta, më 11 maj 2024, në Ankara të Turqisë, FHK u pranua me të drejta të plota në Konfederatën Mesdhetare të Hendbollit, një sukses tjetër i madh.
Në Ankara u realizua edhe një nga synimet e fundit të Izet Gjinovcit, gati tre muaj para se të ndërronte jetë.
Eugen Saraçini drejtoi “anijen” e hendbollit të Kosovës me sukses dhe siguroi pranimin me të drejta të plota të FHK-së në EHF e IHF dhe në Konfederatën Mesdhetare. Ai njihej gjithashtu si mik i madh i Hassan Moustafa, presidentit të IHF-it, duke ndërtuar ura të rëndësishme bashkëpunimi për të ardhmen e hendbollit të Kosovës.
Pasardhësi i tij është Edin Kolgeci.
Duhet theksuar se FHK u pranua me drejta të kufizuara në vitin 2004 në Budapest të Hungarisë, në kohën kur ishte president Mexhit Devaja.