A do ta humbasë finalen e Evropianit ylli i Danimarkës? U dërgua në spital pas një goditjeje në kokë

Hendboll

A do ta humbasë finalen e Evropianit ylli i Danimarkës? U dërgua në spital pas një goditjeje në kokë

Nga: K.G. Më: 30 janar 2026 Në ora: 23:56
Simon Hald

Hendbollisti danez Simon Hald është dërguar në spital pasi pësoi një dëmtim në kokë gjatë gjysmëfinales së Kampionatit Evropian kundër Islandës.

Pivot-i i kombëtares daneze luajti vetëm pjesën e parë dhe nuk u rikthye në fushë në pjesën e dytë, pasi nuk u ndje mirë, raporton TV 2 Sport.

Trajneri i Danimarkës, Nikolaj Jacobsen, konfirmoi për mediat daneze se Hald është dërguar për kontrolle mjekësore.

“Simon u ndje keq dhe u dërgua në spital për ekzaminime.

Kaq mund të them për momentin”, deklaroi Jacobsen pas ndeshjes. Më vonë, në studion e TV2, ai shtoi:

“Mund të konfirmoj se ai është mirë, por sigurisht duhet të shohim nëse është e mençur që të luajë të dielën”.

Mungesa e Hald bëri që Magnus Saugstrup të ishte pivot-i i vetëm në dispozicion të trajnerit danez.

Hald pësoi dy goditje në kokë gjatë pjesës së parë – fillimisht në minutën e 18-të, kur u godit me bërryl nga Gísli Kristjánsson, dhe pak më vonë nga Elidi Víðarsson.

Trajneri Jacobsen pranoi se edhe për të mungesa e Hald ishte një befasi.

“Në fakt, as nuk e vura re menjëherë. Në fillim të pushimit nuk kishte asnjë shenjë, por më pas fizioterapistja jonë Anja erdhi dhe tha se Simon do të vinte për disa minuta – por kjo zgjati më shumë”, shpjegoi Jacobsen, duke përfunduar: “Gjëja më e rëndësishme tani është që Simon të shërohet.

Gjithçka tregon se do të jetë në rregull, pastaj do të shohim nëse mund të luajë të dielën”.

comment Për komente lëvizni më poshtë
Sot mund të lexoni Shfletoni kopertinat