Që nga muaji mars, Kosova është një ndër vendet e shumta të botës që po përballet me situatën e krijuar nga pandemia COVID-19, si dhe numrin e madh të të infektuarve dhe viktimave shkaku i këtij virusi.
Poashtu Kosova është ndër vendet e pakta që ende nuk ka pranuar asnjë vaksinë antiCOVID, teksa u tha se vaksinat e para pritet të arrijnë gjatë muajve të ardhshëm, gjë e cila mbetet të shihet se sa do të jetë e realizueshme.
Por që nga muaji mars e deri më sot janë konfirmuar 1.426 raste të vdekjes.
Komuna e Prishtinës, saktësisht Drejtoria për Shëndetësi ka bërë të ditur se numri i të vdekurve si pasojë e këtij virusi është 214.
Pra përgjatë këtyre muajve përballje me koronavirus janë gjithsej 214 viktima nga Komuna e Prishtinës.
Të pyetur lidhur me numrin e përgjithshëm të pacientëve me COVID-19 që po trajtohen në kuadër të spitalit, u bë e ditur se janë gjithsej 1 mijë e 169 pacientë të cilët po vazhdojnë të marrin trajtim shëndetësorë.
Në kuadër të Prishtinës numri i të shëruarve nga COVID-19 ka arritur në mbi 20 mijë e 748 persona.
Qyteti i Ferizajt poashtu po vazhdon të përballet me situatë të ngjashme të të prekurve me koronavirus.
Nga muaji mars deri më tani nga kjo komunë kanë humbur jetën 89 qytetarë.
“Numri i të vdekurve sipas raportimit zyrtar nga IKSHPK për pacientët ferizajas të infektuar me Sars-Cov-2 (COVID-19) është 89 qytetarë. Numri i pacientëve që po trajtohen në Spitalin e Përgjithshëm të Ferizajt nga ky virus është: 44 të hospitalizuar, 10 të pakonfirmuar, 22 të konfirmuar pozitiv dhe 12 negativ”, u tha në përgjigjen e Komunës së Ferizajt.
Gjithashtu u theksua se numri i të shëruarve nga ky virus ka arritur në 2 mijë e 391 persona.
Në qytetin e Gjakovës situata me COVID-19 vazhdon të jetë mjaftë e rëndë, ku tani për tani janë mbi 173 raste aktive.
Nga muajt e parë të vitit të kaluar deri sot numri total i rasteve me koronavirus ka arritur në 2 mijë e 255.
Nga Komuna e Gjakovës kanë bërë të ditur për lajmi.net se numri i përgjithshëm i viktimave nga COVID-19 është 97 persona.
“Numri total i të shëruarve në Gjakovë është 1979, janë 186 raste aktive dhe trajtimi shëndetësorë në kuadër të Spitalit Rajonal të Gjakovës po vazhdon. Trajtim janë duke marrë 46 pacientë”, u tha në përgjigjen e dhënë nga Komuna e Gjakovës.
Ditë më parë në komunën e Gjilanit u arrit në 100 numri i të vdekurve si pasojë e COVID-19.
Por tani për tani janë gjithsej 170 raste aktive dhe 28 persona të konfirmuar me koronavirus janë në hospitalizim derisa po pritet rezultati i 120 mostrave.
Nga muaji mars deri më sot në kuadër të komunës së Gjilanit kanë humbur jetën 103 persona.
Për fat të mirë nga COVID-19 në këtë qytet janë shëruar 3032 qytetarë.
Sa i përket të dhënave në nivel vendi, janë gjithsej 5 mijë e 324 raste aktive me COVID-19, e numri i përgjithshëm i personave të cilët u dyshuan për këtë virus nga marsi deri më sot është 213.372.
Media ka kërkuar përgjigje edhe nga komunat e tjera, por që të njëjtit nuk janë përgjigjur.
