Sot kontingjenti i parë me vaksina Pfizer, donacion nga Amerika

Kosova

Sot kontingjenti i parë me vaksina Pfizer, donacion nga Amerika

Më: 20 gusht 2021 Në ora: 10:13
Ilustrim

Sot në Kosovë pritet që të mbërrijë kontingjenti i parë me vaksina Pfizer, donacion i Shteteve të Bashkuara të Amerikës.

Në ceremoninë e pritjes do të marrë pjesë edhe kryeministri Albin Kurti.

Kjo është bërë e ditur përmes një njoftimi për media nga Zyra e Kryeministrit.

“Kryeministri Albin Kurti merr pjesë në ceremoninë e arritjes së kontingjentit të parë të vaksinave kundër COVID 19, dhuruar nga Shtetet e Bashkuara të Amerikës”, thuhet në njoftim.

Edhe Ambasada amerikane në Prishtinë, ka bërë të ditur përmes një komunikate për media se sot arrin në Kosovë dërgesa e parë e vaksinave që iu janë dhuruar Kosovës nga SHBA.

Në njoftimin e ambasadës, thuhet se ambasadori amerikan në Prishtinë, Philip Kosnett, presidentja e vendit, Vjosa Osmani dhe kryeministri i Kosovës, Albin Kurti do të mirëpresin dërgesën e parë të vaksinave që janë dhuruar nga SHBA.

Pritja do të bëhet sot në ora 15:00, në oborrin e Institutit kombëtar për shëndetin publik.

“Ambasadori i Sh.B.A.-ve Philip S. Kosnett, Presidentja e Kosovës Vjosa Osmani, Kryeministri i Kosovës Albin Kurti dhe personalitete të tjera do të mirëpresin dërgesën e parë të vaksinave të dhuruara Kosovës nga Sh.B.A.-të në një ceremoni të organizuar me rastin e arritjes së tyre. Kjo ngjarje është planifikuar për: 20 gusht 2021 në ora 15:00 . Oborri i Institutit Kombëtar për Shëndetin Publik Prishtinë”, thuhet në njoftimin e ambasadës.

Shtetet e Bashkuara po dërgojnë këtë javë në Kosovë një kontingjent prej 35 mijë e 100 vaksinash kundër COVID-19.

Vaksinat dërgohen përmes programit COVAX dhe janë pjesë e angazhimit të Shteteve të Bashkuara për të luajtur një rol udhëheqës në luftën për t’i dhënë fund pandemisë kudo në botë.

comment Për komente lëvizni më poshtë
Sot mund të lexoni Shfletoni kopertinat