Nxënësit e dy fshatrave në komunën e Podujevës po përballen me kushte të rënda në shkolla. Infrastruktura e dëmtuar shpeshherë u ka rrezikuar edhe jetën atyre.
Mbajnë emrin e heroit të kombit “Ali Ajeti”. Por gjenden në kushte mjaft të rënda. Dy shkollat me emrin e njëjtë në fshatrat Ballofc dhe Lladofc të Podujevës, tash e disa vjet përballen me infrastrukturë të vjetruar.
Alea Hajdari, nxënëse e klasës së katërt në shkollën fillore “Ali Ajeti” në Ballofc, thotë se nga infrastruktura e dëmtuar shpeshherë i është rrezikuar edhe jeta.
“Këtu janë kushtet e vështira, po pikon uji kur po bjen shi, kur kemi qenë në pushim ka ra tavani”, thotë ajo.
Nxënëse e kësaj shkolle është edhe Anisa Hajdini. Ajo thotë se kushtet jo të mira po ndikojnë edhe në mësim.
“E kam vështirë sepse këtu është pak pluhur dhe bankat janë pak në gjendje jo të mira me i vendos librat është pak vështirë por po mundohem që të jem më e qetë”, thotë ajo.
Megjithatë ajo ka shpresë që vitin e ri shkollor do ta nisë në kushte më të mira.
Pasi objekti i ri shkollor, tashmë është në fazën finale të ndërtimit.
“Po unë jam shumë e lumtur që kemi me dal në shkollën e re kom me vazhdu 4 vjet në shkollën e re dhe besoj që kam me qenë shumë e kënaqur”, shtoi Hajdini.
E në dy shkollat e fshatit Lladofc e Ballofc, përveç kushteve të rënduara infrastrukturore, mungojnë edhe laboratorët si dhe kabinetet përcjellëse.
“Po momentalisht këtu po shihet që shkolla është pak e vjetër në shumë vende po pikon ujë këtu na mungojnë edhe mjete konkretizimi laboratore, mjete të informatikës i kemi disa por jo të mjaftueshme”, thotë Lulzim Ajvazi, drejtor i dy shkollave “Ali Ajeti”.
Se me çfarë po përballen si nxënësit ashtu edhe mësimdhënësit, janë në dijeni edhe zyrtarët e Komunës së Podujevës.
“Ne i kemi gjet këto probleme të trashëguara tanimë edhe në shkollën e Ballofcit dhe Lladofcit këto dy paralele janë të ndara të shkollës ‘Ali Ajeti’ në Sfeçël, ne kemi filluar investimet në fshatin Ballofc, vazhdimin e investimeve për të ndërtuar shkollën e re, dhe nxënësit e atij Komuniteti do t’i pret shkolla e re në muajin Shtator”, thotë Avni Fetahu, drejtor i Arsimit në Komunën e Podujevës.
Nga Komuna thonë se në shkollën e fshatit Lladofc do të bëhen investime, kjo pasi Komisioni Evropian pritet të dhurojë ndihmë financiare 60 mijë euro.
Por deri në finalizimin e punimeve nxënësit e këtushëm do të vazhdojnë të përballen me kushte të rënda.
