Vërshimet e muajit të kaluar kanë lënë pasoja si në bujqësi por edhe në biznese në zonën e Junikut. Dëmet po konsiderohen të mëdha si nga bujqit, bizneset por edhe nga komuna e Junikut.
Pasojat e vërshimeve të fundit në shtratin e lumit Ereniku në Junik ende janë tw dukshme.
Madje, në shumë pjesë janë dëmtuar në masë të konsiderueshme muret anësore dhe shëtitorja pranë tyre.
Po ashtu është dëmtuar krejtësisht rruga fushore në lagjen Berishë ndërsa edhe dëmet në bujqësi nuk janë të vogla.
Kështu është shprehur drejtori i Drejtorisë për Shërbime publike në Junik, Demokrat Ganijaj i cili tha se dëmet e përgjithshme në këtë komunë shkojnë në rreth 500 mijë €.
Ngritja e nivelit të ujit ka bërë që të dëmtohen edhe shumë ekonomi familjare. Më së keqi e ka pësuar Naser Krasniqi të cilit i janë dëmtuar në masë të madhe prodhime nga mobileria e tij.
Ndërkaq sipas zyrtarëve komunal dëmet më të mëdha po llogaritet të jenë në rrugën Junik Gjocaj Gjeravicë, ku krahas dëmtimit të rrugës së asfaltuar ka edhe shembje të mëdha të dheut të cilat e kanë ndërprerë tërësisht qarkullimin.
