Tre kandidatë në garë për pozitën e kryetarit të Gjykatës Themelore në Pejë, fillon procesi i intervistimit

Kosova

Tre kandidatë në garë për pozitën e kryetarit të Gjykatës Themelore në Pejë, fillon procesi i intervistimit

Më: 7 korrik 2025 Në ora: 10:10
Foto ilustrim

Në objektin e Këshillit Gjyqësor të Kosovës (KGJK) ka filluar intervistimi i kandidatëve për kryetar të Gjykatës Themelore në Pejë.

Emrat e kandidatëve për pozitën e kryetarit të Gjykatës Themelore në Pejë janë:

Shemsedin Haxhijaj;

Musë Povataj dhe

Sami Sharraxhiu.

KGJK-ja kishte shpallur konkursin e brendshëm për kryetar të Gjykatës Themelore në Pejë më 28 maj 2025 në mbledhjen e 347-të, raporton “Betimi për Drejtësi“.

Më 1 korrik 2025, përfundoi mandati pesëvjeçar i kryetarit të deritashëm, Armend Berisha.

Intervistat zhvillohet para Komisionit me këtë përbërje: Drita Rexhaj, Fahret Vellija dhe Mirjeta Shala, kurse anëtar rezervë është Vilard Bytyqi.

Ky proces zhvillohet bazuar në Rregulloren e miratuar në KGJK-ja që mban numrin 12/2022, me të cilën rregullohen procedurat për zgjedhjen, emërimin, pezullimin dhe shkarkimin e kryetarëve të gjykatave dhe gjyqtarëve mbikëqyrës.

Pas përfundimit të intervistimit, sipas Rregullores, Komisioni përpilon raportin final me emrat e kandidatëve të suksesshëm, i cili i dorëzohet Këshillit.

Ky Këshill, pastaj zhvillon procedurën e votimit për emërimin e kryetarit/es dhe kandidati që merr më së shumti vota, emri i tij i dërgohet Presidentes së Shtetit për dekretim.

Në rast se kandidati nuk merr votat e nevojshme në raundin e parë, kalohet në të dytin dhe në rast se as në të dytin nuk merr shumicën e thjeshtë të votave, kalohet në raundin e tretë me emrat e dy kandidatëve më të votuar. E nëse as në raundin e tretë nuk arrihet që kandidati të marrë votat e nevojshme, konkursi rishpallet nga Këshilli.

Për këtë proces, KGJK-ja ka dërguar ftesën për monitorim të intervistave, duke potencuar se procesin e mbështetë në parimin e meritokracisë, transparencës, trajtimit të barabartë dhe të mbështetur në një proces objektiv.

Instituti i Kosovës për Drejtësi është duke e monitoruar këtë proces.

comment Për komente lëvizni më poshtë
Sot mund të lexoni Shfletoni kopertinat