“Mosmarrëveshja e re me Bullgarinë si politikanë na vë në një pozitë të palakmueshme për të kërkuar shpjegim të arsyeshëm për qytetarët se ka një kërkesë të re, e cila nuk ishte pjesë e kërkesave të mëparshme për marrjen e datës për fillimin e negociatave me BE -në, për të cilën e kemi punuar shumë”.
Këtë e theksoi kryetari i Kuvendit të Maqedonisë së Veriut Talat Xhaferi, në fjalimin e tij në takimin e kryetarëve të parlamenteve të Ballkanit Perëndimor, në Brdo në Slloveni.
“Tejkaluam kontestin e gjatë me Greqinë dhe nënshkruam Marrëveshjen me Bullgarinë. Këta hapa shtetërorë nuk do të ishin realitet nëse nuk do të kishte konstruktivitet dhe dialog politik në Kuvend, sepse shumë nga zgjidhjet e nevojshme ligjore kërkonin sigurimin e shumicës prej dy të tretave. Të gjitha partitë parlamentare u bashkuan në miratimin e tyre, të vetëdijshme për peshën dhe përgjegjësinë që marrin, megjithatë, të bindur se në këtë mënyrë ata zbatojnë vullnetin e qytetarëve tanë, pra përmbushjen e reformave për hyrjen në fazën tjetër të procesit të integrimit, fillimin e negociatave deri në anëtarësimin e plotë në Bashkimin Evropian”.
“Ne bëjmë çdo përpjekje, por duke pasur parasysh faktin se sondazhet e fundit dhe kontaktet tona të drejtpërdrejta me qytetarët janë ngjyrosur nga një zhgënjim dhe mosbesim i madh se ky proces do të ketë përfundim të suksesshëm dhe se gjithmonë do të ketë kërkesa të reja. Entuziazmi edhe te qytetarët edhe te politikanët mund të zbehet”, tha Xhaferi.
Në takimin e kryetarëve të parlamenteve, i cili është pjesë e Presidencës Sllovene të BE -së, Xhaferi tha se është i vetëdijshëm se Bashkimi Evropian aktualisht po përballet me shumë sfida që lidhen me reformën e institucioneve dhe funksionimin e ardhshëm, të cilat duhet ta bëjnë atë më të fortë, më konkurrues dhe më të sigurt në botën globale.
