Maqedoni, në tremujorin e dytë banesat shënuan rritje të çmimit prej 16.5%

Maqedonia

Maqedoni, në tremujorin e dytë banesat shënuan rritje të çmimit prej 16.5%

Më: 11 gusht 2022 Në ora: 22:24
Foto ilustrim

Në tremujorin e dytë të këtij viti, banesat janë shtrenjtuar për 16.5%, që sipas të dhënave të Bankës Popullore të RMV-së, është rritja më e madhe deri më tani. Kjo rritje çmimesh vjen për shkak të shtrenjtimit të materialit ndërtimor, shpjegon Andrea Serafimovski nga Shoqata e Ndërtimtarisë pranë Odës Ekonomike. Shton se nuk mund të presim të ulet çmimi i banesave, por mund të ketë vetëm stabilizim të çmimit i cili do të jetë real dhe do ta reflektojë atë që mund ta paguajnë qytetarët për t’i mbuluar shpenzimet dhe për të përfituar investitorët.

“Tendenca e rritjes së çmimeve dhe kostos për ndërtim vazhdon të rritet. Materialet e nevojshme për ndërtim kanë shënuar rritje tepër të madhe. Çmimi i materialit, druri është dyfishuar, kompensata njësoj, betoni është për 50% më i shtrenjtë për shkak të rritjes së çmimit të çimentos, e mos të flasim për konstruksionet prej çeliku. Profilet e çelikut janë shtrenjtuar trefish, çmimi i çelikut të zakonshëm është rritur për dyfish”, tha Andrea Serafimovski, kryetar i shoqatës së ndërtimtarisë.

Po nga ana tjetër, edhe përkundër fuqisë së reduktuar blerëse të qytetarëve, krizës ekonomike dhe paralajmërimeve për rritjen e normave të interesit, interesi për blerjen e apartamenteve nuk ka të ndalur, por shtohet gjithnjë e më shumë, thonë nga agjencitë për patundshmëri. Sipas tyre, problemi është oferta. S’ka banesa të mjaftueshme për shitje, prandaj Shkupi s’mund t’i kënaqë nevojat e qytetarëve për blerje të apartamenteve.

Çmimi i banesave në Shkup:

Komuna Qendër – nga 1.500 deri në 2.100 euro

Karposhi – nga 1.350 deri në 1600 euro

Aerodromi – nga 1.300 deri në 1.500 euro

Kisella Vodë – nga 1.250 deri në 1.400 euro

Gjorçe Petrovi – nga 950 deri në 1.100 euro

Çairi – nga 950 deri në 1.100 euro

“Oferta është katastrofë. Kjo për shkak të disa faktorëve që u shfaqën në Shkup. Komuna Qendër kishte një moratorium për 4-5 vjet. PDU-ja në Karposh ra, 4-5 vjet me radhë nuk u votua PDU-ja e re. Automatikisht, lagjet në të cilat ka kërkesë më të madhe për banesa, nuk kanë banesa. Aerodromi kishte apartamente, por të gjithë ata që nuk arritën të gjejnë, u riorientuan këtu dhe nuk ka apartamente. Nuk ka ofertë, kurse kërkesa është tejet e madhe”, pohoi Dejan Hriston, pronar i një Agjencie për Patundshmëri.

Apartamentet në lagjet më tërheqëse siç janë Aerodromi, Qendra dhe Karposhi nuk presin për t’u shitur as dy ditë, tregon Hristovi. Sipas regjistrimit të Entit Shtetëror për Statistikë, prej gjithsej 839.174 banesa, 63,4% tashmë janë të banuara, kurse 307,187 ose 36,6 % janë të pabanuara.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat