Bashkia e Shkupit ka dalë me reagim pas dorëheqjes së nënkryetares, Bujare Abazi.
Nga Bashkia thonë se Bujare Abazi nuk ka qenë zgjidhje partiake dhe është emëruar në pozitën e nënkryetares si person që duhet të përfaqësojë interesat e qytetarëve.
“Sinqerisht na vjen keq që Abazi vendosi ta vendosë partinë para interesit të qytetit dhe të Shkupit, por ky është vendimi i saj. Departizimi në institucione duhet të jetë postulat mbi të cilin do të ndërtohen institucionet publike profesionale, dhe kushdo që i vendos interesat partiake mbi interesat publike, është e qartë se nuk mund të funksionojë në drejtim të përfaqësimit adekuat të qytetarëve të Shkupit”, thuhet në reagimin e Bashkisë së Shkupit.
Ndryshe, pas dorëheqjes së Bujare Abazit, tani ASH nuk ka asnjë funksion drejtues në Bashkinë e Shkupit. Bujare Abazi do të vazhdojë të jetë këshilltare në kryeqytet.
