Zv. kryeministrja përgjegjëse për politika të qeverisjes së mirë, Sllavica Grkovska, gjatë vizitës së saj të punës në Shtetet e Bashkuara të Amerikës, u takua me Jason Orlando, drejtor i Zyrës për Asistencë Teknike në Ministrinë e Financave të Shteteve të Bashkuara.
Në takim u bisedua për bashkëpunimin reciprok tashmë të filluar e të iniciuar nga zv. kryeministrja Grkovska dhe ministri i Financave Fatmir Besimi, me qëllim të mbështetjes në ngritjen e kapaciteteve, veçanërisht në trajtimin e problemeve si pastrimi i parave, hetimet financiare, si dhe miratimin e ligjeve për pastrimin e parave.
Të gjitha këto çështje mbulohen në rekomandimet e Komisionit Evropian në Raportin për progresin e vendit tonë në vitin 2022.
Grkovska theksoi se, për fat të keq, Maqedonia e Veriut nuk është imune ndaj fenomenit të pastrimit të parave dhe përballet me një sfidë të madhe në luftën kundër krimit ekonomik.
Ajo theksoi se përgatitja e zgjidhjes ligjore për origjinën e pasurisë ka rëndësi të madhe për identifikimin dhe konfiskimin e pasurisë, prejardhja e së cilës nuk mund të përcaktohet dhe kjo do të kontribuojë ndjeshëm në luftën kundër korrupsionit dhe krimit ekonomik.
Orlando iu referua gjithçkaje që është konfirmuar deri më tani në drejtim të bashkëpunimit të përbashkët bazuar në letrën zyrtare të marrë në qershor të vitit të kaluar të nënshkruar nga zëvendëskryeministrja Grkovska dhe ministri Besimi.
Ai njoftoi se janë duke u përgatitur gjithsej katër aktivitete për ngritjen e kapaciteteve në përputhje me nevojat e shprehura dhe përshëndeti faktin që këto projekte marrin mbështetje nga Kabineti përgjegjës për politika të qeverisjes së mirë, gjë që konfirmon edhe një herë vendosmërinë e fortë të Maqedonisë së Veriut në arritjen e qëllimeve të përcaktuara.
