Situata ekonomike që po kalon Barcelona është kritike siç demonstrohet nga numrat që tregon regjistri i klubit për sezonin e kaluar dhe të cilat u lëshuan disa ditë më parë edhe në publik.
Borxhi i klubit është i madh dhe mungesa e likuiditetit është alarmante. Dhe kjo mungesë e parave të gatshme po ndikon te lojtarët. Disa ditë më parë “Cadena Cope” zbuloi që klubi u detyrohej një pjesë të pagave lojtarëve të ekipit të parë.
Dhe një prej tyre është Leo Messi. Barcelona duhej t’ia kishte paguar atij para fundit të janarit 72 milionë euro që korrespondon me kontratën e tij për sezonin aktual. Deri më tani, ai i ka pranuar vetëm 8.5 milionë dhe i kanë mbetur për të marrë edhe 63.5 milionë, që përfshin dosjen e lojtarit të ekipit të parë dhe imazhin e lojtarit..
Problemet e likuiditetit ndikojnë në pjesën tjetër të lojtarëve në skuadër të cilët disa javë më parë arritën një marrëveshje me klubin për të shtyrë një pjesë të të ardhurave nga ky sezon në vitet e ardhshme.
Me këtë marrëveshje, klubi e kurseu veten nga pagesa e 172 milionë eurove. Kjo marrëveshje preku të gjithë lojtarët në skuadër, përfshirë Leo Messin, përveç katër lojtarëve që kishin arritur një marrëveshje të mëparshme: Piqué, Lenglet, De Jong dhe Ter Stegen.
