Shqipëria bind me lojë dhe fiton ndaj Qipros ndeshjen e dytë

Futboll

Shqipëria bind me lojë dhe fiton ndaj Qipros ndeshjen e dytë

Më: 8 prill 2022 Në ora: 15:04
Shqipëria bind me lojë dhe fiton ndaj Qipros ndeshjen e dytë

Shqipëria U-19 për femra ka fituar sot ndaj Qipros me shifrat 2-0. Dy golat e kësaj sfide të dytë, e vlefshme për kualifikueset e Kampionatit Europian 2022 për këtë grupmoshë, u shënua në minutën e 16-të të takimit nga Klea Hamonikaj dhe në minutën e 90-të fiksoi rezultatin autogoli i Vasiliou.

Trajneri Kreshnik Krepi e nisi lojën me këtë formacion: Hyska (c), Blinishta, Gjergji, Vuksani, Tanushi, Iliadhi, Mema, Armoku, Caka, Puca, Hamonikaj. Vajzat kuqezi treguan karakter në këtë ndeshje të dytë ndaj qiprioteve, teksa që në minutën e dytë të lojës tregohen të rrezikshme.

Është Iris Armoku ajo që fillimisht krijon rastin e parë që në minutën e dytë, teksa nuk përfiton mirë me topin brenda zonës, duke e dërguar jashtë. Skuadra luan mirë dhe tenton sërish, derisa në minutën e 16-të Klea Hamonikaj zhbllokoi rezultatin. Puca goditi vetë topin nga brenda zonës, teksa topi kapi traversën dhe nuk kaloi vijën, duke u kthyer pas, nga ku përfiton edhe Hamonikaj që e dërgon topin në rrjetë. Festë në kampin kuqezi dhe te skuadra, të cilat vazhdojnë të kërkojnë golin e dytë, por bllokohen nga kundërshtaret. Në fund të pjesës së parë, Fabiola Caka humbet një rast të pastër për të dyfishuar rezultatin.

Me nisjen e fraksionit të dytë të lojës, skuadra del më e karikuar në fushë, teksa sërish kërkon një gol të dytë, duke iu afruar disa herë zonës qipriote, ndërsa e gjen vetëm në minutën e fundit të kohës së rregullt. Është Iris Armoku ajo që gjuan drejt portës, me topin që devijohet nga Vasiliou, duke përfunduar në rrjetë. Këto janë tre pikët e para për vajzat kuqezi në grup, falë një loje mjaft të mirë e të dominuar thuajse në pjesën më të madhe nga ekipi ynë.

Shqipëria do të zhvillojë edhe ndeshjen e tretë dhe të fundit ndaj Turqisë, vendit pritës, të hënën më 11 prill, teksa në sfidën e parë u mund nga Izraeli me shifrat 2-0.

commentFirst article
Sot mund të lexoni Shfletoni kopertinat