Tifozët e Bayernit nderojnë Harry Kanen me një mesazh të veçantë

Futboll

Tifozët e Bayernit nderojnë Harry Kanen me një mesazh të veçantë

Më: 31 tetor 2026 Në ora: 19:06
Pamje

Harry Kane ka përjetuar një moment emocional përpara derbit të madh mes Bayern Munihut dhe Borussia Dortmundit.

Tifozët bavarezë i kanë kushtuar një pankartë të veçantë sulmuesit anglez, pas fitimit të Topit të Artë për sezonin 2025/26, ndërsa klubi organizoi një ceremoni në “Allianz Arena” në praninë e familjes së tij.

Përpara fillimit të përballjes së shumëpritur në Bundesliga, tifozët e Bayern Munichut në tribunën jugore, të njohur si Südkurve, shpalosën një pankartë në nderim të Harry Kanet.

“Jo një yll që kërkon spektakël, por një futbollist ashtu siç duhet të jetë. Urime, Harry!”, shkruhej në mesazhin e tifozëve.

Gjesti ishte një vlerësim për paraqitjet e sulmuesit anglez, i cili të hënën në Londër u nderua me Topin e Artë për performancat e tij gjatë sezonit 2025/26.

Kane prezanton Topin e Artë para tifozëve

Pas mesazhit të tifozëve, drejtuesit e Bayern Munichut organizuan një ceremoni të veçantë në fushën e “Allianz Arena”.

Pak para fillimit të ndeshjes kundër Borussia Dortmundit, Kane ishte futbollisti i fundit që doli në fushë, duke mbajtur në duar trofeun prestigjioz.

Atë e prisnin bashkëlojtarët, drejtuesit e klubit, bashkëshortja dhe katër fëmijët e tij.

Sulmuesi anglez përshëndeti dhe përqafoi familjarët, përpara se t’u drejtohej tifozëve të pranishëm në stadium.

“Jam shumë krenar që jam futbollist i Bayern Munichut”, deklaroi Kane.

Ai e përfundoi fjalimin e shkurtër me një falënderim në gjuhën gjermane: “Dankeschön!”.

Një arritje historike për Bayern Munihun

Fitimi i Topit të Artë nga Kane përfaqëson një moment të rëndësishëm edhe për historinë e klubit bavarez.

Ai është futbollisti i parë i Bayern Munichut që e fiton këtë çmim që nga Karl-Heinz Rummenigge, i cili u nderua në vitin 1981.

Ceremonia përpara derbit kundër Dortmundit ishte një mundësi për klubin dhe tifozët që ta festonin këtë arritje së bashku.

Sot mund të lexoni Shfletoni kopertinat