Futbollisti shqiptar Brajan Gruda, i cili luajti për 86 minuta me fanellën e Gjermanisë në përballjen ndaj Serbisë në Beograd, është shpallur lojtari i ndeshjes nga platforma e specializuar e statistikave sportive “Sofascore”.
Gruda realizoi në minutën e 50-të, në fitoren 3:1 të Gjermanisë ndaj Serbisë, në stadiumin “Rajko Mitiç” në Beograd.
Futbollisti shqiptar shkëlqeu me një aksion individual, duke depërtuar nga gjysma e fushës, duke kaluar dy futbollistë serbë dhe më pas, nga rreth 17 metra, dërgoi topin në këndin e poshtëm të majtë të portës për rezultatin 0:3.
Paraqitja e tij u vlerësua me notën fantastike 9.0 nga “Sofascore”.
Te Gjermania, pas Grudës, vlerësimin më të lartë e mori Maximilian Mittelstadt, me notën 8.5.
Për Grudën, kjo ndeshje do të mbetet e veçantë, pasi në debutimin e tij me Kombëtaren A të Gjermanisë arriti të shënojë golin e parë, dhe atë pikërisht në Beograd, përballë Serbisë.