Young Boys e fitoi derbin ndaj kampionit të Zvicrës, Thun, me rezultat 3:2, në ndeshjen e zhvilluar në shtëpi. Të pesë golat u shënuan në pjesën e dytë.
YB përmbysi disavantazhin dhe në minutat e fundit iu desh të luftonte për t'i ruajtur tri pikët.
Ndeshjet mes Thunit dhe Young Boys janë kthyer në ndeshje me shumë gola. Pas rezultateve 8:3 dhe 6”0, kësaj radhe YB triumfoi me rezultat 3:2. Megjithatë, pas pjesës së parë, e cila u karakterizua nga pak raste shënimi, askush nuk mund ta parashikonte një spektakël të tillë në stadiumin Wankdorf.
Vetëm dy minuta pas fillimit të pjesës së dytë, Noah Christoffersson i kaloi mysafirët në epërsi, duke shënuar golin e tij të parë me fanellën e Thunit.
Sulmuesi suedez u përfshi në formacionin titullar pasi Furkan Dursun u lëndua gjatë nxehjes para ndeshjes.
Megjithatë, Young Boys reagoi menjëherë. Vetëm tri minuta më vonë, Alvyn Sanches barazoi rezultatin, duke realizuar golin e tij të pestë në këtë sezon.
Momenti i ndeshjes tashmë ishte në anën e vendasve. As zëvendësimi i detyruar i Bahereba Guirassy, i cili po zhvillonte një paraqitje të mirë, nuk e prishi ritmin e YB-së.
Përkundrazi, zëvendësuesi i tij, Kaly Sène, u përshtat menjëherë me lojën. Vetëm shtatë minuta pas inkuadrimit në fushë, ai realizoi një aksion të shkëlqyer individual dhe i dha YB-së epërsinë për herë të parë në këtë ndeshje.
Keller ia siguron fitoren YB-së
Gjërat u përmirësuan edhe më shumë për vendasit, të cilët tashmë dukej se e kishin plotësisht nën kontroll ndeshjen.
Natyrisht, në listën e golashënuesve duhej të përfshihej edhe golashënuesi më i mirë i skuadrës, Samuel Essende. Me golin e tij të 16-të këtë sezon, të shënuar në minutën e 82-të, ai dukej se e kishte vulosur fitoren.
Por, pavarësisht epërsisë prej dy golash, Young Boys përjetoi minuta dramatike deri në fund.
Fabio Fehr ngushtoi rezultatin në minutën e 87-të, duke rikthyer shpresat e Thunit. Goditja e tij u devijua dhe u bë e pandalshme për portierin.
Ashtu siç ka ndodhur shpesh këtë sezon, mbrojtja e YB-së papritur u vu nën presion të madh.
Në fund, ishte portieri Marvin Keller ai që e shpëtoi skuadrën. Me dy pritje fantastike gjatë minutave shtesë, ai ia siguroi Young Boys-it tri pikët.
Fabio Fehr dhe Nils Reichmuth humbën raste shumë të mira për ta barazuar rezultatin.
Penalltia e hershme për YB-në anulohet
Ndeshja nisi me një episod të rëndësishëm. Që pas pak më shumë se një minute lojë, gjyqtari akordoi penallti për vendasit.
Një goditje e Guirassy-t, nga afërsia, kishte përfunduar në krahun e Nassim Zoukit.
Megjithatë, pas konsultimit me sistemin VAR, gjyqtari Johannes von Mandach e ndryshoi vendimin dhe anuloi penalltinë.
Ky ishte praktikisht episodi i vetëm i rëndësishëm në pjesën e parë. Të dyja skuadrat e ruajtën spektaklin për pjesën e dytë.