Federata e Hendbollit e Kosovës i ka bërë të gjitha përgatitjet për Kampionatin Evropian (B) të hendbollisteve deri në 17 vjet.
Ky Evropian mbahet prej të hënës (nesër) deri të dielën e javës së ardhshme në Pallatin e Rinisë dhe Sportit në Prishtinë.
Janë tetë ekipe kombëtare të hendbollisteve të reja që kërkojnë suksesin në Prishtinë.
Në grupin A janë Kosova, Finlanda, Letonia dhe Bullgaria. Grupi B përbëhet nga Italia, Izraeli, Ukraina dhe Britania e Madhe.
Ndeshjet e fazës grupore janë prej të hënës deri të enjten. Dy kombëtaret e para nga secili grup kualifikohen në gjysmëfinale.
Gjysmëfinalet janë të shtunën, më 9 gusht, ndërsa finalja është të dielën, më 10 gusht.
Ndeshjet e së hënës janë: Izraeli – Britania e Madhe (12:15), Italia – Ukraina (14:30), Finlanda – Letonia (16:45), Kosova – Bullgaria (19:15). Para ndeshjes së Kosovës është ceremonia hapëse e Evropianit.