Viti i ri akademik sot nisi edhe në Universitetin e Prishtinës. Këtë vit, mbi 4100 studentë të rinj janë regjistruar në dhjetëra programe studimore të ofruara nga 14 njësi akademike.
Mjekësia, edukimi e disa degë të filozofisë ishin drejtimet të cilat joshën më shumë studentët të cilët nisën vitin e ri akademik në Universitetin e Prishtinës. Studentët u shprehën të kënaqur që viti i ri akademik ka filluar me kohë.
"Jam shumë e kënaqur që kemi filluar me ligjëratat dhe me studimet si studente e re e këtij departamenti, sigurisht jam e emocionuar mirëpo jam shumë e kënaqur që kam filluar me studime", Zejnepe Makovci, studente në degën e Gazetarisë.
"Mezi po e pres ta filloj këtë vit të ri shkollor, pasi që kemi pasur tri vite më parë në shkolla me shokët tanë, tashmë, është një shoqëri e re", tha Riad Latifi, student në degën e Gazetarisë.
"Viti i ri akademik ka filluar me kohë në këtë mënyrë gjithçka shkon me rend edhe nuk humbim asnjë hap gjatë studimeve", Blinera Hajdari, studente në vitin e dytë në degën Letërsi Shqipe.
Të gjitha njësitë akademike kanë bërë pritjen e studentëve të rinj në Universitetin e Prishtinës.
"Ne i kemi dy tri fakultete të cilat kanë interesim tradicionalisht shumë të madh për t'u studiuar Fakulteti i Mjekësisë, Edukimit disa programe të caktuara në fakultetin Filozofik dhe fakultetin Filologjik. Interesim pak më të vogël ka pasur në fakultetin Ekonomik", tha Naser Sahiti, Rektor i Universitetit të Prishtinës.
Rektori i Universitetit tha se sfida më e madhe për këtë vit akademik do të jetë furnizimi me energji elektrike për shkak të ndërprerjeve të shpeshta dhe furnizimi me ngrohje.
