Zhvillimi i sistemeve të ujitjes në Podujevë vazhdon të jetë në fokus të Ministrisë së Bujqësisë, për të mbështetur bujqësinë lokale.
Autoritetet sot prezantuan sistemin e kanalit të ujitjes me rënie të lirë në zonën e Lupçit për të mundësuar furnizimin e tokave bujqësore, projekt ky që kap vlerën 110 mijë euro.
Ndërkohë që në Parkun Bujqësor në Sfeqël, u nënshkruan tri marrëveshje, përmes të cilave do të mbështeten projekte strategjike që kontribuojnë në rritjen e produktivitetit bujqësor dhe përmirësimin e kushteve për fermerët e llapit.
Kanali i ujit që filloi të ndërtohej në janar të këtij viti, vlerësohet si një nga investimet shumë të rëndësishme në bujqësi, sektor ky që shihet si shtyllë e zhvillimit ekonomik lokal.
Vlera e projektit të Parkut Bujqësor është rreth 1.4 milion euro, ndërsa sipërfaqja e tij është 6 hektarë tokë.
U tha se ky investim është një nga projektet më inovative në sektorin e bujqësisë dhe do të jetë parku i parë bujqësor i këtij lloji në Kosovë.
Parku Bujqësor paralajmërohet se do të përmbyllet në pranverën e vitit të ardhshëm.
