Aktorja dhe këngëtarja Janelle Monáe bëri një nga paraqitjet më të komentuara të Met Gala 2025, duke sjellë një pamje sureale dhe avangarde që kapërceu kufijtë mes modës, artit dhe inovacionit. E veshur me një pelerinë trompe l’oeil me shpatulla të ekzagjeruara, mbi një kostum të zi, të kuq dhe të bardhë me vija të holla, Monáe u shfaq si një figurë futuriste dhe klasike njëkohësisht, duke rikrijuar estetikën e modës me ndihmën e stilistit të njohur Paul Tazewell.
Pjesa më e pazakontë dhe novatore e veshjes së saj nuk ishte vetëm dizajni dramatik nga Thom Browne, por një aksesor i jashtëzakonshëm që tërhoqi vëmendjen e të gjithëve: një brosh diamanti, i varur në kapelën e saj bowler, i krijuar nga... tekila.
Po, saktësisht. Broshi ishte prodhuar nga 1800 Tequila dhe ishte përpunuar nga stilisti i bizhuterive Jonathan Raksha, i cili realizoi një "gur diamanti" të prerë në formë smeraldi, me 5.5 karatësh, duke përdorur tekilë të lëngshme Cristalino. Ky gur u vendos mbi një bazë prej safiri të bardhë prej më shumë se 70 karatësh, i rrethuar nga ar i bardhë dhe diamante të përmbysura në anët përreth.
Sipas Raksha-s, diamanti jo-konvencional u krijua për të përfaqësuar shpirtin e tekilës – një përzierje e natyrës, kohës dhe mjeshtërisë. “Çdo detaj i broshës me diamant 1800 Tequila është projektuar për të sjellë në jetë shpirtin e tekilës në një formë të ngurtë dhe të veshshme,” tha ai për Page Six Style. Ai shtoi se struktura e diamantëve të përmbysur ishte frymëzuar nga natyra me thumba e bimës agave.
Monáe, e cila njihet për zgjedhjet e saj artistike të guximshme, e përshkroi aksesorin si një simbol poetik. “Ashtu si diamantet formohen nën presion me kalimin e kohës, edhe 1800 Cristalino kalon një proces të ngjashëm, duke u kthyer nga një agavë blu në një tekilë añejo të rafinuar dhe kristalore. Ishte një mënyrë për të kapur lëvizjen dhe qartësinë në një moment të ngrirë – dhe në një mënyrë të veshshme,” u shpreh ajo në një njoftim për shtyp përpara galas.
Veshja e Janelle Monáe nuk ishte vetëm një shfaqje mode, por një deklaratë konceptuale që sfidoi kufijtë e asaj që konsiderohet bizhuteri apo material i çmuar. Një diamant i bërë nga tekila? Në Met Gala, gjithçka është e mundur – veçanërisht kur bëhet fjalë për Monáe.
