Mason Thames dhe McKenna Grace, dy nga emrat më premtues të brezit të ri në Hollywood, janë fotografuar së fundmi dorë për dore gjatë një daljeje të qetë në Los Angeles. Pamjet e publikuara kanë bërë xhiron e rrjeteve sociale, duke ndezur kuriozitetin e fansave dhe duke ngritur pyetjen: a kemi të bëjmë me çiftin e ardhshëm të artë të Hollivudit?
Të dy aktorët kanë fituar zemrat e publikut me talentin dhe pjekurinë e tyre në role të vështira.
Thames, i njohur për interpretimin e tij të fuqishëm në The Black Phone, dhe Grace, që ka spikatur në projekte si The Handmaid’s Tale dhe Ghostbusters: Afterlife, janë parë gjithnjë e më shpesh në shoqërinë e njëri-tjetrit, por kjo dalje e fundit duket se ka shtuar edhe më shumë zërat për një lidhje të mundshme mes tyre.
Duke buzëqeshur dhe duke ndarë momente të qeta, Thames dhe Grace dukeshin shumë të afërt, ndërsa ecin pranë njëri-tjetrit, dorë për dore. Asnjëri prej tyre nuk ka bërë ende një koment publik për këtë paraqitje, por fansat tashmë po imagjinojnë jo vetëm një romancë të mundshme, por edhe bashkëpunime të ardhshme artistike mes tyre.
Nëse kjo është thjesht një miqësi e fortë apo diçka më tepër, koha do ta tregojë. Ajo që dihet me siguri është se Mason Thames dhe McKenna Grace janë dy yje në ngjitje — dhe tani, duket se po ndriçojnë së bashku edhe jashtë kamerave.
