Heidi Klum rrëmben vëmendjen në Javën e Modës në Paris me paraqitjen e saj unike në sfilatën e VETEMENTS për koleksionin pranverë/verë 2026.
Supermodelja 52-vjeçare shkëlqeu në pasarelë me një fustan transparent prej dantelle me motive lulesh, të cilin e kombinoi me të brendshme të bardha dhe taka elegante në ngjyrë nudo.
Ajo që ra veçanërisht në sy ishte aksesorja më e pazakontë e mbrëmjes — një palë “gold grillz” (dhëmbë të artë), të cilat shtuan një dozë guximi dhe origjinaliteti në pamjen e saj, shkruan Daily Mail, transmeton "Bota sot".
E njohur për stilin e saj të veçantë dhe vetëbesimin në pasarela, Heidi kompletoi pamjen me syze të mëdha të zeza, duke u shfaqur sërish si një ikonë e vërtetë mode.
Më vonë, Klum veshi një pallto gri me prerje klasike dhe iu bashkua vajzës së saj, Leni Klum, për disa foto përpara nisjes së sfilatës.
Leni, 21 vjeçe, e cila po ndërton me sukses karrierën e saj në industrinë e modës, u shfaq me një look elegant dhe të rafinuar: një këmishë të zezë të shkurtër dhe një fund klasik, të shoqëruar me taka të zeza.
Nënë e bijë pozonin plot stil përpara fotografëve, të shoqëruara edhe nga miku i ngushtë i Heidi-t, muzikanti Bill Kaulitz.
